Աղբիւր՝ www.alikonline.ir

Այս նշանաբանով եւ շուրջ 3000 հայրենակիցների ներկայութեամբ, ուրախ մթնոլորտում, մարզաւանի ֆուտբոլի դաշտի շրջափակում նշւեց Հ.Մ. «Արարատ» կազմակերպութեան 70-ամեակը:

Բանուկ էին կազմակերպութեան Երէցների, Սկաուտական եւ Հանրութեան հետ կապի տաղաւարները, կազմակերպւած էին մարզական մրցութիւններ եւ մանկական զբաղումներ: Աշխատում էր ճոխ բուֆէ:

Ծրագրի պաշտօնական բաժնում, որը կայացաւ ֆուտբոլի հիւսիսային դարպասի մօտ, հաղորդավար Արտոյտ Զոհրաբեանը նշեց. «70 տարի առաջ ճիշտ այս օրը՝ 1944 թւականի յուլիսի 4-ին, հինգ պատանեկան միութիւնների միացումով, ընդամէնը 121 հոգով եւ մի փոքրիկ գրասենեակով, հիմքը դրւեց մի ընտանիքի, որը յետոյ պիտի կոչւէր ՀԱՅ ՄՇԱԿՈՒԹԱՅԻՆ «ԱՐԱՐԱՏ» ԿԱԶՄԱԿԵՐՊՈՒԹԻՒՆ:

Այսօր այդ ընտանիքը արդէն 70 տարի, սակայն նոյն երիտասարդական աւիւնով ապրում ու բարգաւաճում է, իր լուսաւոր ու հիւրընկալ բնակարանով՝ «Արարատ» մարզաւանով» եւ շնորհաւորեց տարեդարձը, որին հետեւեց կազմակերպութեան հիմնը:

Այնուհետեւ ելոյթ ունեցան Հ.Մ.Ա.Կ.-ի պարախումբը եւ Էդւին Հայրապետեանը՝ իր նւագախմբով: Տորթը կտրելու համար հրաւիրւեցին կազմակերպութեան հիմնադիրներ՝ Յասմիկ Թումանեանը, Աշոտ Ստեփանեանը, «Արարատ»-ի ժամանակի նախագահ Վարուժան Առաքելեանը, Կենտրոնական վարչութեան նախագահ Համլետ Խալոյեանն ու փոխնախագահ Արմինէ Սէթխանեանը, որոնց ուղեկցում էին կազմակերպութեան տարբեր բաժինների կրտսեր անդամները:

Տորթը կտրելու արարողութիւնը ուղեկցւեց գեղեցիկ հրավառութեամբ: Այնուհետեւ Էդւին Հայրապետեանը իր նւագախմբի ընկերակցութեամբ շարունակեց ուրախ երգերի շարանը: