Աղբիւր՝ www.yerakouyn.com
Մոսկուայի 37-րդ ֆիլմի միջազգային փառատօնը այս տարի կը կայանայ Յունիս 19-26 եւ առանձին ծրագիրով կ’անդրադառնայ Հայոց ցեղասպանութեան հարիւրերորդ տարելիցին, կը յայտնեն «Ոսկէ ծիրան» ֆիլմի փառատօնի մամլոյ ծառայութենէն:
ՀՀ ժողովրդական արուեստագէտ, «Ոսկէ ծիրան» ֆիլմի փառատօնի հիմնադիր տնօրէն, բեմադրիչ, Մոսկուայի ՄԿՓ-ի վաւերագրական ֆիլմերու միջազգային մրցութային պատուաւոր ժիւրիի անդամ Յարութիւն Խաչատրեան կ’ըսէ, որ փառատօնը այս տարի կ’ամփոփէ «Ոսկէ ծիրան» Երեւանի միջազգային ֆիլմի փառատօնի նախաձեռնած` Մեծ Եղեռնին նուիրուած ֆիլմերու ցուցադրութեան «Այլեւս երբեք…» ծրագիրի առաջին փուլը:
«Այլեւս երբեք…» ծրագիրի ծիրէն ներս Մոսկուայի մէջ կը ցուցադրուին` «Հանդիպում ցուցահանդէսում» (բեմադրիչ` Ներսէս Յովհաննիսեան), «Նահապետ» (բեմադրիչ` Հենրիկ Մալեան), «Երկունք» (բեմադրիչ` Ֆրունզէ Դովլաթեան), «Աքսորում երգողները» (բեմադրիչ` Թուրի եւ Նաթալի Ֆինոչչիարօ Ռոզետի), «Սարոյեանի հողը» (բեմադրիչ` Լուսին Տինք), «Ճչացողները» (բեմադրիչ` Գառլա Կարապետեան, «Վանայ ծովուն արշալոյսը» (բեմադրիչ` Արտակ Իգիթեան, Վահան Ստեփանեան) ֆիլմերը: