Իսլ. խորհրդարանում իրանահայ համայնքների զոյգ պատգամաւորներ՝ Ռոբերտ Բեգլարեանը եւ Արա Շահվերդեանը հրապարակելով Դատական իշխանութեան յղւած շրջաբերականի պատճէնը, յայտնել են, որ Դատական իշխանութեան շրջաբերականի համաձայն, ինչը յղւած է ողջ երկրի գլխաւոր դատարաններին ու դատաւորներին, քաղաքացիական օրէնսգրքի 881-րդ յօդւածը Սահմանադրութեամբ հաստատւած Աստւածային կրօնների հետեւորդների (քրիստոնեայ իրանցիներ, զրադաշտական եւ հրեաներ) վերաբերեալ կիրառելի չէ այլեւս, եւ ժառանգութեան բաժանումը պէտք է հաշւարկւի եւ կատարւի քաղաքացու նախկին դաւանանքի օրէնքների հիման վրայ. տեղեկացնում է «alikonline.ir»-ը։
Քաղաքացիական օրէնսգրքի 881-րդ յօդւածի համաձայն, որն ուժի մէջ էր 1370 թւականից, «անհաւատների» ժառանգութեան իրաւունքները սահմանւած էր իսլամադաւանի նկատմամբ չունեցած ժառանգութեան իրաւունքով: Նոյն օրէնքի համաձայն, եթէ մահացածի ժառանգների թւում կայ իսլամադաւան ժառանգորդ, ապա անհաւատ համարւող միւս ժառանգները չէին կարող համարւել ժառանգութեան իրաւայաջորդներ, նոյնիսկ այն դէպքում, եթէ հարազատութեան աստիճանով նրանք աւելի մօտ են համարւում հանգուցեալին, քան իսլամադաւանն էր»:
Շրջաբերականով դատական իշխանութիւնը շեշտադրում է, որ օրէնքի այդ կէտը չպէտք է կիրառւի Սահմանադրութեամբ ճանաչւած Աստւածային կրօնների հետեւորդների դէպքում, այսինքն՝ օրէնքը չի տարածւում քրիստոնեաների, զրադաշտականների եւ հրեաների վրայ, «ուստի ժառանգութիւնը պէտք է բաժանւի՝ ելնելով «հանգուցեալի դաւանած կրօնի հանգամանքներից»:
Նոյն կապակցութեամբ նշենք, որ թերթիս այսօրւայ համարով հրապարակւած Արա Շահվերդեանի հետ մեր զրոյցում եւս շօշափել էինք նոյն խնդիրը, ինչը, սակայն, քանի որ հարցազրոյցի պահին այն դեռ հանգուցալուծւած չէր, ապա հարցազրոյցում այդ մասին նշւել է, որ խնդիրը շարունակում է մնալ չլուծւած... թէեւ պատգամաւորը յաւելել էր, որ ինքն «անյոյս չէ» տւեալ խնդրի լուծման կապակցութեամբ:
Ռոբերտ Բեգլարեանն նոյն առիթով սոցիալական ցանցի իր էջում հրապարակելով փաստաթուղթը յաւելել է, որ պառլամենտում կրօնական փոքրամասնութիւնների պատգամաւորների աւելի քան տասնհինգ տարւայ շարունակական հետեւողականութեամբ եւ նամակագրութիւնների, ինչպէս նաեւ ներկայացւած օրինական փաստարկների միջոցով, յատկապէս վկայակոչելով բարձրաստիճան կրօնական եւ վարչական մարմինների ու պաշտօնեաների տեսակէտները, եւ անցկացնելով մասնագիտացւած բազմակողմանի հանդիպումներ, յաջողւել է փոխըմբռնման հասնել դատական համակարգի հետ: «Արդիւնքում գրանցւեց Դատական իշխանութեան մեծարգոյ առաջին տեղակալի 12/09/1401 թ. թիւ 1000/23767/9000 շրջաբերականն յղւած ողջ հանրապետութեան դատարաններին»,- արձանագրել է պրն. Բեգլարեանը։