Աղբիւր՝ www.yerkir.am
ՓՈՔՐԻԿՆԵՐԸ ԾԻՐԱՆՈՎ ԵՒ ԼԱՎԱՇՈՎ ԴԻՄԱՎՈՐԵՑԻՆ ՀՌՈՄԻ ՊԱՊԻՆ
15:00-ին Երևանի «Զվարթնոց» օդանավակայանում վայրէջք կատարեց Հռոմի պապի ինքնաթիռը: Նրան դիմավորելու են եկել ՀՀ նախագահ Սերժ Սարգսյանը, առաջին տիկին Ռիտա Սարգսյանը, Գարեգին Երկրորդ Ամենայն հայոց կաթողիկոսը, դեսպաններ, հոգևորականներ:
Ամենաառաջինը Հռոմի պապին մոտեցան ազգային տարազով երկու փոքրիկներ, ծիրան և լավաշ մատուցեցին: Այնուհետև Հռոմի պապի ձեռքը սեղմեցին ՀՀ նախագահը, առաջին տիկինը, Ամենայն հայոց կաթողիկոսը: Դիմավորելու ժամանակ «Հայաստանի փոքրիկ երգիչներ» երգչախումբը կատարում էր եկեղեցական շարականներ: Հռոմի պապին դիմավորեց նաև պատվո պահակախումբը:
Նշենք, որ Հռոմի պապն ուխտագնացության է եկել առաջին քրիստոնյա երկիր` Հայաստան, որպես խաղաղության սուրհանդակ:
Աղբիւր՝ www.yerkir.am
ՀՌՈՄԻ ՊԱՊԸ ԷՋՄԻԱԾՆՈՒՄ ՀԱՄԲՈՒՐԵՑ ՍՈՒՐԲ ԱՎԵՏԱՐԱՆՆ ՈՒ ՍԲ ԽԱՉԸ
Հռոմի պապը «Զվարթնոց» օդանավակայանից մեկնեց Էջմիածին և եկեղեցական զանգերի ղողանջների ներքո մտավ Մայր տաճար: Հռոմի պապին դիմավորելու էր եկել հայ ժողովրդի հոծ բազմություն, որոնց մեծ մասը` երեխաներ: Մուտք գործելով Մայր տաճար` նա համբուրեց Սբ Ավետարանն ու Սբ Խաչը: Նա օրհնեց Մայր տաճարում գտնվող ժողովրդին, որից հետո ընթերցեց «Ի մեջ տաճարիս» աղոթքը:
Եկեղեցական երգչախումբը շարականներ է կատարում: Կատարվում է խնկարկություն:
Ողջույնի խոսքով հանդես եկավ Ամենայն հայոց կաթողիկոս Գարեգին Երկրորդը` երախտագիտություն հայտնելով Հռոմի պապին Հայաստան կատարած այցի համար: