ՀԱՄԱԽՄԲՒԵՆՔ ԱԶԳԻ ՈՒ ՀԱՅՐԵՆԻՔԻ ԳԵՐԱԳՈՅՆ ՇԱՀԵՐԻ ՇՈՒՐՋ
Նոր Տարւայ սեմին, քրիստոնէական ջերմ սիրով ու հայրապետական օրհնութեամբ ողջունում ենք մեր ժողովրդի սիրելի զաւակներին:
Նոր Տարին մարդուն, անհատապէս թէ հաւաքաբար, ինքնահայեցողութեա՛ն ու ինքնաքննութեա՛ն հրաւիրող պահ է։ Եկէք մի պահ մեր հայեացքները սեւեռենք հայ կեանքի վրայ։
Ինչպէս համայն մարդկութիւնը, նոյնպէս մեր ժողովուրդը, շարունակում է ապրել համաճարակի ստեղծած դժւար պայմանների մէջ։ Սփիւռքի բոլոր գաղութները, առաւել կամ նւազ չափով, դիմագրաւում են այլազան մտահոգութիւններ։ Այս ծիրում, յատկապէս Լիբանանի հայութիւնն ապրում է ծանր օրեր՝ տնտեսական աննախընթաց տագնապի հետեւանքով։ Հակառակ ներկայ դառն պայմաններին, մենք պէտք է շարունակենք, վերանորոգ հաւատքով ու վճռակամութեամբ, վերականգնումի մեր հաւաքական երթը՝ միշտ լինելով մեր ժողովրդի զաւակների հետ ու նրանց կողքին։
Արդարեւ, 2022 տարին հռչակել ենք Սփիւռքի Տարի։ Հրաւիրում եմ մեր բոլոր կառոյցներին, մամուլին, մտաւորականներին եւ գաղութներին՝ իրապաշտ մօտեցումով եւ համապարփակ հայեացքով, ինչպէս նաեւ այս առիթով հրապարակած մեր հայրապետական Գիրն ունենալով որպէս ուղեցոյց, նախ, ինքնարժեւորման ենթարկելու եւ ապա վերակազմակերպման առաջնորդելու Սփիւռքը։ Սա հրամայական ու անյետաձգելի առաջնահերթութիւն է։
Դառնանք Հայաստանին։ Մեր հայրենիքը շարունակում է անորոշութեան ու յուսահատութեան ալիքների մէջ օրօրւել։ Մէկ կողմից՝ ներ-հայաստանեան քաղաքական լարւած մթնոլորտը ջլատում է մեր հաւաքական ուժը։ Միւս կողմից՝ թշնամին յաղթապանծ դիրքերից պայմաններ է դնում Հայաստանի դէմ՝ անտեսելով Հայաստանի հողային ամբողջականութիւնը ու գերիշխանութիւնը, ինչպէս նաեւ՝ միջազգային օրէնքները։
Այո՛, մենք փոքր երկիր ենք. հարկ է իրատես մօտեցում ունենալ տարածաշրջանի ներկայ աշխարհաքաղաքական պայմանների հոլովոյթի նկատմամբ։ Սակայն, այդ չի նշանակում, որ Հայաստանը ասելիք պիտի չունենայ իր ազգային շահերին առնչւած եւ իր ներկան ու ապագան ճշտող խնդիրների գծով։
Այո՛, տարածաշրջանում համապարփակ ու մնայուն խաղաղութեան հաստատմանը համաձայն ենք. բայց ո՛չ պարտւողական ու զիջողական դիրքերից։
Այո՛, տարածաշրջանում տնտեսական զարգացումներին նպաստող ծրագրերին համաձայն ենք. բայց ո՛չ ի հեճուկս Հայաստանի ու Արցախի գերիշխանութեան, անկախութեան, անվտանգութեան ու հողային ամբողջականութեան։
Այսօր, Թուրքիոյ եւ Ադրբէջանի կողմից համադրւած փան-թուրանական ռազմավարութիւն է փորձւում ի գործ դրւել Հայաստանի եւ ամբողջ շրջանի նկատմամբ։ Զգօ՛ն ու հեռատե՛ս լինենք։ Արդարեւ, որեւէ համաձայնագրի ստորագրութիւն Ադրբէջանի հետ՝ որտեղ Ադրբէջանի տարածքային ամբողջականութեան մէջ ներառւած է Արցախը, նոյնպէս, որեւէ համաձայնութիւն Թուրքիոյ հետ՝ որ ընդունում է Թուրքիոյ բացայայտ նախապայմանները, փաստօրէն Հայաստանի կողմից Անկախութեան Հռչակագրի եւ Սահմանադրութեան սկզբունքների խախտում է լինելու։ Նման վտանգալից քայլերի նկատմամբ Սփիւռքը չի՛ կարող անտարբեր մնալ։ Համահայկական խնդիրների քննարկման մէջ Սփիւռքն իր գործօն մասնակցութիւնը պէտք է ունենայ՝ ինչպէս յաճախ շեշտել ենք։ Մեր թշնամիներն ու բարեկամները պէտք է իմանան, որ Հայաստանը անտէր չէ, որբ չէ, ողջ Սփիւռքը նրա կողքին է, հայութիւնը մէկ ու անբաժանելի ամբողջութիւն է։
Ինչ-ինչ պատճառներով մի ճակատամարտ կորցրինք, բայց ոչ՝ պատերազմը։ Ի խնդիր Հայաստանի ու Արցախի անկախութեան ամրապնդման եւ մեր ազգային իրաւունքների վերահաստատման՝ համահայկական պայքարը շարունակւում է... ։
Համահայկական պայքարը պէ՛տք է շարունակւի՝
– հայոց բանակը վերակազմակերպելով ու այն արդիական զէնքերով օժտելով,
– մեր սահմանները պաշտպանելով, ի պահանջել հարկին՝ ժողովրդային դիմադրութեան դիմելով,
– մարտունակ ոգով բանակցութիւններ վարելով,
– համախմբւելով հայրենիքի գերագոյն ու ընդհանրական շահերի շուրջ։
Եկէ՛ք վերանորոգենք մեր ազգային ուխտը, եւ առաւել հաւատով ու կամքով գօտեպնդւած ողջունենք իրար ասելով՝ Շնորհաւոր Նոր Տարի։ Թող Աստւած օրհնի մեր ազգի բոլոր զաւակներին եւ ամէն տեսակ չարից ու չարիքից հեռու պահի մեր Ազգն ու Հայրենիքը։
ԱՐԱՄ Ա. ԿԱԹՈՂԻԿՈՍ
ՄԵԾԻ ՏԱՆՆ ԿԻԼԻԿԻՈՅ
26 Դեկտեմբեր, 2021
Անթիլիաս, Լիբանան