Աղբիւր՝ www.asbarez.com
Ամենայն Հայոց Գարեգին Բ Կաթողիկոսը եւ Մեծի Տանն Կիլիկիոյ Արամ Ա Կաթողիկոսը՝ բարձրաստիճան հոգեւորականների ընկերակցութեամբ, 10 նոյեմբերին այցելեցին Ծիծեռնակաբերդի յուշահամալիրը եւ ծաղկեպսակ զետեղեցին Եղեռնի զոհերի յիշատակին:
Կաթողիկոսները հոգեհանգստեան արարողութիւն կատարեցին՝ ի յիշատակ Մեծ Եղեռնի նահատակների:
«Բնականաբար, մեր մտածումն էր, որպէսզի այսօր մինչեւ Եպիսկոպոսաց ժողովի աշխատանքների սկիզբը մեր եպիսկոպոսաց դասով այցելենք Ծիծեռնակաբերդի յուշահամալիր, մեր խոնարհումը բերենք մեր 1,5 միլիոն նահատակ զաւակների յիշատակին եւ մեր աղօթքը բարձրացնենք աշխարհասփիւռ մեր ժողովրդի խաղաղ, ապահով կեանքի համար, եւ հայցենք տիրոջից, որպէսզի Եպիսկոպոսաց ժողովի աշխատանքները Սուրբ Հոգու շնորհների ներքոյ իրականացւեն, եւ սպասւող ակնկալութիւնները մեր ժողովրդի իրականան»,- յայտնեց Գարեգին Բ Կաթողիկոսը՝ զրուցելով լրագրողների հետ:
Մեծի Տանն Կիլիկիոյ Արամ Ա Կաթողիկոսն ասաց, որ Ցեղասպանութեան 100-ամեայ տարելիցը նշանաւորւելու է երկու կարեւոր իրադարձութիւններով:
«Հայոց Ցեղասպանութեան հարիւրամեակը վճռական անկիւնադարձ պէտք է դառնայ մեր ժողովրդի պատմութեան մէջ: 100 տարի մենք յիշեցինք եւ յիշեցրինք, հիմա ժամանակն է, որ մեր պահանջատիրութեան նոր ուժականութիւն եւ նոր գունաւորում տանք: Նախորդ ամիսներին ես յաճախակի կերպով այս կէտը շեշտեցի, բաւական չէ 100-ամեակի առիթով ձեռնարկներ կազմակերպել, յիշել մեր նահատակներին. այդ բոլորը կարեւոր են անկասկա՛ծ, սակայն ես կարծում եմ, որ երկու կարեւոր իրադարձութիւններ պէտք է լինեն. առաջինը Ցեղասպանութեան նահատակների սրբադասումն է, այդ նահատակներին ժողովուրդն ընդունում է իբրեւ հաւատքի եւ հայրենիքի նկատմամբ արիւն թափած նահատակների, երկրորդը՝ Հայաստանի եւ Սփիւռքի մէջ տեղի ունենալիք նախաձեռնութիւններն ու հանդիսութիւններն են, որոնք պէտք է հետեւողականօրէն շեշտեն մեր ժողովրդի պահանջատիրական կեցւածքը»,- հաստատեց Արամ Ա Կաթողիկոսը: