Հոկտեմբերի 18-ին ադրբեջանական զինւած ուժերը հարաւային ուղղութեամբ ձեռնարկել էին տանկերով ուղեկցւող յարձակում` օգտագործելով 7 տանկ, այդ թւում` մէկ միաւոր Տ-90, 5 զրահափոխադրիչ հետեւակի տեղափոխման համար: Տեղեկացրել է ՀՀ պաշտպանութեան նախարարութեան մամլոյ քարտուղար Շուշան Ստեփանեանը:

Հակառակորդը նպատակադրւել էր սրընթաց յարձակմամբ կրակային եւ հոգեբանական ճնշում գործադրել անձնակազմի վրայ` ապահովելով ճեղքում սահմանի կարեւոր հատւածում:

Գնդապետներ Ստեփան Գէորգեանի, Ստանիսլաւ Երեօմինի եւ հակատանկիստ, շարքային Գարիկ Առաքելեանի մասնագիտական վարպետութեան, բարոյակամային բարձր որակների եւ գերազանց ներդաշնակ գործողութիւնների շնորհիւ յարձակումը խափանւել եւ հակառակորդը մի քանի կիլոմետր յետ է շպրտւել: