Շաբաթ՝ 2014 թւականի մայիսի 31-ի առաւօտեան, Սպահանի նահանգապետարանի պատասխանատուների ընկերակցութեամբ, Ս. Ամենափրկչեան վանք այցելեցին Ամերիկայի Միացեալ Նահանգների Միաստւածեան կրօնների կրօնական խոհականների պատւիրակութիւնը, որոնց շարքում էին ԱՄՆ-ի նախագահի հոգեւոր եւ կրօնական հարցերում խորհրդատուներ հոգեւորական դոկտ. Ժուլ Հանթերը եւ տկն. Բարբարա Վիլիամզ Սքինզը:

Պատւիրակութեանը դիմաւորեցին հոգշ. Տ. Անանիա վրդ. Գուճանեանը, Թեմական խորհրդի անդամ պրն. Վարուժ Մովսիսեանը եւ Կրօնական խորհրդի ատենապետ պրն. Արշալոյս Խուդավերդեանը:

Խմբի անդամներն այցելելով «Ս. Յովսէփ Արեմաթացի» եկեղեցի հիացմունքով դիտեցին եկեղեցու որմնանկարներն ու շինութիւնը, ապա այցելեցին «Խաչատուր Կեսարացի»-ի անւան թանգարան, որտեղ տեղադրւած Հայոց ցեղասպանութեան տաղաւարը նրանց յատուկ ուշադրութեանն արժանացաւ: 

Ծաղկեայ դահլիճում կայացած հանդիպման ընթացքում, Հոգշ. Տ. Անանիա վրդ. Գուճանեանը ողջոյնի եւ բարի-գալստեան խօսք ուղղեց հիւրերին եւ իր ուրախութիւնը յայտնեց պատւիրակութեան այցի համար: Նա ներկաներին ընդհանուր տեղեկութիւններ փոխանցեց Սպահանի հայոց թեմի ազգային, կրօնական, մշակութային եւ հասարակական կեանքի վերաբերեալ, ինչպէս նաեւ Իրանի իսլամական հանրապետութիւնում հայութեանն ընձեռւած առանձնայատուկ կարգավիճակի եւ իրաւունքների մասին, շեշտելով, որ Իրանը հանդիսանում է համակեցութեան եւ համագոյակցութեան օրինակելի երկիր, որտեղ զանազան կրօնական եւ ազգային փոքրամասնութիւններ ապրում են կողք-կողքի՝ եղբայրաբար եւ խաղաղութեամբ: Հայր Սուրբն իր խօսքի շարունակութեան մէջ անդրադարձաւ Հայոց ցեղասպանութեան իրողութեանը եւ պատւիրակութեան անդամներից խնդրեց սոյն հարցը բարձրաձայնել միջազգային ատեաններում եւ ջանքեր գործադրել, որպէսզի ԱՄՆ-ի պետութիւնը այն պաշտօնապէս ճանաչի: 

Պրն. Վարուժ Մովսիսեանը Թեմական Խորհրդի անունից ողջունեց պատւիրակութեան անդամների այցը եւ մաղթեց, որ շարունակական են լինելու միջազգային մակարդակի պատւիրակութիւնների հետ յարաբերութիւններն ու նրանց այցելութիւնները:

Պատւիրակութեան անդամները հերթաբար արտայայտւելով՝ իրենց զօրակցութիւնն ու համակրանքը յայտնեցին հայ ժողովրդին ու Հայոց եկեղեցուն եւ խստիւ դատապարտեցին Թուրքիայի կողմից խաղաղութեան եւ մարդկային իրաւունքների ոտնահարման ուղղութեամբ կատարւած եւ իրագործւող բոլոր վայրագութիւնները: Նրանք յիշեցնելով, որ Թուրքիան այսօր եւս շարունակում է իր նախնիների ընթացքը՝ այս անգամ Սիրիայի ներքին խնդիրներում իր բացասական, խառնակիչ ու ահաբեկչական գործունէութիւնը ծաւալելով, շեշտեցին, որ նման հարցերի շուրջ անտարբեր չեն լինելու եւ հաստատակամ աշխատելու են աշխարհում խաղաղութիւն հաստատելու եւ իսլամ-քրիստոնեայ եղբայրական ու աստւածային սիրոյ օրինակով հաշտ ապրելու ուղղութեամբ: 

Խօսք առնելով ԱՄՆ-ի նախագահի հոգեւոր հարցերում խորհրդատու հոգեւորական դոկտ. Ժուլ Հանթերը, շեշտեց, որ հարազատ թարգմանն են հանդիսանալու Իրանում տիրող իրավիճակի, նաեւ հետամուտ են լինելու Հայոց ցեղասպանութեան ճանաչման գործում:

Վերջում հիւրերն իրենց տպաւորութիւններն արտայայտեցին Ս. Ամենափրկչեան վանքի սքանչելի կառոյցի կապակցութեամբ: 

Պաշտօնական հանդիպման աւարտին ներկաները աղօթք բարձրացրին առ Աստւած՝ աշխարհում խաղաղութեան հաստատման, Սիրիայում տիրող ծանր պայմանների վերացման եւ համայն մարդկութեան միջեւ խաղաղ համագոյակցութեան համար:

Վերջում Մեծ եղեռնի նահատակների յուշարձանի առջեւ հոգշ. Հայր Սուրբի հոգեհանգստեան աղօթքից յետոյ, հիւրերը հրաժեշտ տւեցին, թողնելով Ս. Ամենափրկչեան վանքը: