Աղբիւր՝ www.alikonline.ir

 

«Համայն հայութիւնը, թէ՛ Հայաստանը եւ թէ՛ Սփիւռքը ամբողջական նւիրումով լծւած են Լիբանանի հայութեանը նպաստելու այս աշխատանքին»

 «ԱԼԻՔ», Կ. Դ. - Օգոստոսի 4-ին Բէյրութի նաւահանգստում տեղի ունեցած ահաւոր պայթիւնի հետեւանքով մեծապէս տուժել է Բէյրութի հայկական համայնքը, ոչ միայն նիւթապէս, այլ մարդկային կորուստների առումով:

Տուժած հայկական համայնքին իր նպաստը նւիրաբերելու նպատակով, նախաձեռնութեամբ Թ. Հ. Թ. Թեմական խորհրդի, կազմակերպւել էր նւիրահաւաք, մասնակցութեամբ համայնքի գործարար-բարերարների եւ միութիւնների ներկայացուցիչների:

«Արարատ» մարզաւանի Ս. Խաչ մատուռի շրջափակում երէկ՝ օգոստոսի 10-ին կազմակերպւած նւիրահաւաքին, Թերանի հայոց թեմի առաջնորդ Տ. Սեպուհ արք. Սարգսեանը ներկաներին հրաւիրեց մէկ րոպէ յոտնկայս յարգել պայթիւնի հետեւանքով զոհւածների յիշատակը: Իր ելոյթի ընթացքում թեմակալ առաջնորդը ընդգծեց, որ մեծապէս տուժել են հայկական բոլոր կառոյցները եւ նշեց. «Ես համոզւած եմ, որ մեր ազգը մէկ ընտանիք է, եւ ընտանիքի անդամները, որ երկնակամարի տակ էլ որ լինեն, այդ երկնակամարը մեզ միացնում եւ ամբողջացնում է: Ուստի մեր բոլորի պարտականութիւնն է, որքան հնարաւոր է ելքեր գտնել եւ մեր բարոյական ու նիւթական զօրակցութիւնն ու աջակցութիւնը դրսեւորել, որպէսզի կարողանանք մեղմել մեր ժողովրդի զաւակների տառապանքը»: Սրբազան Հայրը մէջբերում կատարեց Մեծի Տանն Կիլիկիոյ կաթողիկոս Արամ Ա-ի հետեւեալ յայտարարութիւնը՝ ուղղւած Լիբանանի հայութեանը, ասելով. «Լիբանանի հայութիւն մի՛ վհատիր, մի՛ յուսահատւիր, մեր ամբողջ ազգը քեզի հետ է»: Սրբազան Հայրը ընդգծեց. «Մենք էլ ընդառաջ գնալով Վեհափառ Հայրապետի կոչին, մեր լիբանանցի եղբայրներին եւ քոյրերին ասում ենք՝ մենք ձեզ հետ ենք: Ուստի մենք եւս մեր լուման ենք բերելու եւ ես Վեհափառ Հայրապետին եմ փոխանցելու, որ մեր համայնքը իր բոլոր հատւածներով կանգնած է Լիբանանի հայութեան կողքին»:

Թեմակալ առաջնորդի ելոյթին յաջորդեց Թ. Հ. Թ. Թեմական խորհրդի ատենապետ ճրտպ. Նորայր Արամեանի լուսաբանական բացատրութիւնները կապւած այս դէպքին: Նա ընդգծեց, որ պայթիւնից անմիջապէս յետոյ, չորեքշաբթի օրը խորհրդակցական հանդիպում է կազմակերպւել թեմակալ առաջնորդի հետ, քննարկելու օժանդակութիւններ տրամադրելու միջոցները, իսկ Թեմական խորհուրդը իր օգոստոսի 6-ի արտահերթ նիստում որոշում ընդունեց նախաձեռնել նւիրահաւաք՝ «Արարատ» մարզաւանում, մասնակցութեամբ բարերաների, նաեւ Թեհրանի եկեղեցիներում, որտեղ համայնքը կարող է իր նւիրատւութիւնները տրամադրել առաւօտեան ժամը 10-ից մինչեւ երեկոյեան ժամը 5-ը:

Միջոցառմանը ելոյթով հանդէս եկաւ Հայ Յեղափոխական Դաշնակցութեան Բիւրոյի անդամ ճրտգ. Վիգէն Բաղումեանը, անդրադառնալով Բէյրութի ահաւոր իրավիճակին եւ ընդգծելով, որ այդ ծանր պայմանների առաջին իսկ րոպէներից ասպարէզ է իջել գիտակից եւ յանձնառու հայ երիտասարդութիւնը, չխնայելով իր կարելին, սկսած քաղաքը աւերածութիւնից մաքրելով, մինչեւ վիրաւորներին Լիբանանի Հայկական օգնութեան միութեան՝ ԼՕԽ-ի բուժկենտրոններ տեղափոխելն ու տուժածներին վերահասութիւնը: Նա ընդգծեց, որ արդէն իսկ նիւթական մեծ օգնութիւններ են ուղարկւել Բէյրութ եւ աւելացրեց՝ քանի որ հայկական համայնքի թաղամասերը եւ կենտրոնները մեծամասնաբար գտնւում են պայթիւնից տուժած տարածքներում, ուստի ամենաշատ վնասներն են կրել եւ գրեթէ չկայ չտուժած հայկական կառոյց եւ ընտանիք, որոնցից որոշները նոյնիսկ չունեն գիշերելու վայր: Նա կարեւորութեամբ անդրադարձաւ Բէյրութի պայթիւնին յաջորդած քաղաքական բարդ իրավիճակին, յոյս յայտնելով, որ ինչքան շուտ կարգաւորւի իրավիճակը, եւ ընդգծեց. «Համայն հայութիւնը, թէ՛ Հայաստանը, եւ թէ՛ Սփիւռքը ամբողջական նւիրումով լծւած են Լիբանանի հայութեանը նպաստելու այս աշխատանքին եւ մենք, որպէս իրանահայութիւն մեր մասնակցութիւնն ենք բերում եւ յուսանք լաւագոյնս կարողանանք իրականացնել այն»:

Միջոցառմանը ներկայ էին՝ Իրանում ՀՀ արտակարգ եւ լիազօր դեսպան Արտաշէս Թումանեանը եւ դեսպանութեան խորհրդական Էդւարդ Խաչատրեանը, Իրանում Էստոնիայի պատւոյ հիւպատոս Արմէն Մութաֆեանը, Իսլ. խորհրդարանում իրանահաութեան պատգամաւորներ՝ Արա Շահվերդեանն ու Ռոբերտ Բեգլարեանը, Թ. Հ. Թ. Պատգամաւորական ժողովի, Թեմական խորհրդի, ազգային մարմինների, «Ալիք» հաստատութեան եւ միութիւնների ներկայացուցիչներ, որոնք բոլորը իրենց նւիրատւութիւններով մասնակցեցին նւիրահաւաքին:

Յաւելենք նաեւ, որ կատարւել են հանդիսութեանը հրաւիրւած, բայց ներկայ չեղող մի շարք ազգայինների հեռակայ նւիրատւութիւններ, որոնք համակարգւում են պատկան միաւորի կողմից: