Երկուշաբթի՝ 2014 թւականի ապրիլի 21-ին, Սպահանի հայոց թեմի թեմակալ առաջնորդ գերշ. Տ. Բաբգէն եպս. Չարեանի գլխաւորութեամբ, Պատգամաւորական ժողովի դիւանի եւ Թեմական խորհրդի ատենապետեր պրնյք. Վարուժ Մինասեանը եւ Նոէլ Մինասեանը, Թեմական խորհրդի անդամ եւ Սպահանի պետական համալսարանի Հայագիտական ամբիոնի դասախօս տկն. Քառոլին Դիլանչեանը, նոյն ամբիոնի դասախօս, իրաւաբան պրն. Ռազմիկ Տէր Մկրտչեանը եւ Թեմական խորհրդի գործավար պրն. Արթին Մուրադեանը քաղաքավարական այցով հանդիպեցին Սպահանի պետական համալսարանի նորանշանակ տնօրէն՝ դոկտ. Թալեբիի հետ: Հանդիպմանը ներկայ էին համալսարանի տնօրէնի խորհրդական դոկտ. Իռաւանին եւ համալսարանի միջազգային յարաբերութիւնների տնօրէն դոկտ. Շահինը:

Հանդիպման սկզբում Թեմակալ առաջնորդը շնորհակալութիւն յայտնելով ընդունելութեան համար, իր եւ ազգային իշխանութեան անունից շնորհաւորանքի խօսք ուղղեց համալսարանի տնօրէն՝ դոկտ. Թալեբիին, այդ պաշտօնին նշանակւելու եւ Նոռուզի առթիւ, յայտնելով, որ այցելութեան նպատակներից է Ազգային առաջնորդարանի եւ համալսարանի միջեւ գոյութիւն ունեցող համագործակցութիւնն աւելիով ամրապնդել եւ ընդլայնել: Գերշ. Սրբազան Հայրն անդրադառնալով առաւել  քան 50 տարի անցեալ ունեցող Հայագիտական ամբիոնին, յիշեցրեց այն նախնական համաձայնութիւնը, որը կայացել է Ազգային առաջնորդարանի եւ համալսարանի նախկին տնօրինութեան միջեւ՝ ամբիոնում գերլիսանսի եւ դոկտորայի օղակներում ուսանողներ ընդունելու կապակցութեամբ, եւ այդ ուղղութեամբ Հայաստանի համալսարանների կարեւոր դերակատարութեան մասին: Գերշ. Տ. Բաբգէն եպս. Չարեանն առիթը պատեհ համարելով, համալսարանի ղեկավարութեանը տեղեկութիւններ փոխանցեց նաեւ Հայոց ցեղասպանութեան ոգեկչման աշխատանքների վերաբերեալ եւ յիշեցրեց Սիրիայի Քեսաբ քաղաքում տեղի ունեցած իրադարձութիւնների մէջ Թուրքիայի հակահայկական կեցւածքի դրսեւորման մասին: Առաջնորդ Սրբազան Հայրը դիտել տւեց, որ նման անմարդկային արարքներ կանխելու համար համամարդկային եւ միջազգային ճիգ ու աշխատանք է պէտք, շեշտելով որ այս ուղղութեամբ Սպահանի պետական համալսարանն ունի մեծ հնարաւորութիւններ, որոնցով կարելի է դրական քայլեր վերցնել Հայոց ցեղասպանութեան դատապարտման ուղղութամբ:

Սպահանի պետական համալսարանի տնօրէն դկտ. Թալեբին ուրախութիւն յայտնելով պատւիրակութեան այցելութեան առթիւ, շնորհակալութիւն յայտնեց համալսարանի հետ համագործակցելու ուղղութեամբ ազգային առաջնորդարանի դրական եւ հետեւողական կեցւածքի համար եւ ողջունելի համարեց այն իրականութիւնը, որ իրանական համալսարանների հետ ոչ պետական կառոյցների համագործակցութեան եւ ներդրումի առաջին երեւոյթներից է համարւում հայագիտական ամբիոնի ստեղծումը Սպահանի պետական համալսարանում: Պրն. Թալեբին տեղեկութիւններ փոխանցեց հայագիտութեան ամբիոնի կապակցութեամբ համալսարանի տնօրինութեան ունեցած յատուկ ուշադրութեան եւ Երեւանի պետական համալսարանի հետ ծաւալած յարաբերութիւնների մասին, որը խթան է հանդիսանալու Հայագիտական ամբիոնի կրթական մակարդակի բարձրացմանը: Նա միաժամանակ շեշտեց, որ ամբիոնի ուսանողութեան թւի բարձրացումը նպաստելու է նրա արդիւնաւէտութեանը, որի համար անհրաժեշտ է յատկապէս հայ ուսանողների ներգրաւումը, իսկ այս գործում՝ առաջնորդարանի ծանուցողական եւ քարոզչական աշխատանքները:

Հանդիպման աւարտին Ազգային առաջնորդարանի կողմից յուշանւէր յանձնւեց համալսարանի նորանշանակ տնօրէնին եւ երկու կողմերը հրաժեշտ տւեցին իրար: