Երեքշաբթի՝ 2013 թւականի Մայիսի 14-ի առաւօտեան ժամը 11:00-ին, Ս. Ամենափրկչեան Վանք ժամանեց Լիբանանից ժամանած երեք հոգանոց մտաւորականների մի պատւիրակութիւն՝ որին անդամակցում էին մէկ քահանայ եւ համալսարանի երկու դասախօսներ. վերոնշեալները «Ջոմհուրի Էսլամի» պետական լրատւական կազմակերպութեան միջոցով հրաւիրւել էին Թեհրան՝ «Կրօն եւ լրատւամիջոց» համագումարին մասնակցելու համար:

Ս.Ա. Վանքի Ծաղկեայ Դահլիճում պատւիրակութեանն ընդունեց Սպահանի Հայոց Թեմի առաջնորդ գերշ. Տ. Բաբգէն եպս Չարեանը: Ներկայ էին նաեւ Շահինշահրի հայ համայնքի հոգեւոր տեսուչ հոգշ. Տ. Անանիա վրդ. Գուճանեանը եւ արժն. Տ. Մեսրոպ քհնյ. Գալստանեանը:

Գերշ. Սրբազան Հայրը բարի գալուստ մաղթելով հիւրերին, համապարփակ կերպով բացատրութիւններ փոխանցեց Սպահանի Հայոց Թեմի մասին եւ Նոր Ջուղայում ու շրջաններում բնակւող հայութեան ընդհանուր կացութեան, ազգային-հասարակական կեանքի ե գործունէութեան մասին: Նա պատասխանելով հիւրերի մի շարք հարցումներին՝ շեշտեց, որ Իրանում հայութեան իրաւունքներն ամրագրւած են սահմանադրական օրէնքներով եւ պետութեան մօտ հայերի նկատմամբ առկայ է մեծ համակրանք: Առաջնորդ Սրբազան Հայրն ընդգծեց, որ մինչ Իրանի սահմաններից այն կողմ որոշ երկրներ շարունակելով իրենց հակահայ քաղաքականութիւնը՝ ոչնչացնում են մեր դարաւոր պատմա-մշակութային կոթողները, այստեղ՝ Իրանի ամբողջ տարածքում, պետական մակարդակով ծրագրեր են իրագործւում՝ պահպանելու եւ անհրաժեշտ պարագաներում նորոգելու պատմական արժէք ներկայացնող հայկական ժառանգութիւնները: Նաեւ Հայոց Ցեղասպանութեան ոգեկոչման եւ մեր արդար Դատի կապակցութեամբ, պետական մարմինների արտօնութեամբ միջոցառումներ են կազմակերպւում ամենամեայ դրութեամբ:

Պատւիրակութեան անդամներն իրենց հիացմունքը յայտնեցին՝ Իրանում ապրող քրիստոնեայ համայնքների գործօն եւ բարգաւաճ իրավիճակի կապակցութեամբ, եւ շեշտեցին, որ Իրանում գոյութիւն ունեցող միաստւածեան կրօնների համակեցութիւնն ու բարի-դրացիական յարաբերութիւնները լաւագոյն օրինակը կարող են հանդիսանալ ամբողջ երկրների համար՝ սիրոյ, համերաշխութեան, հանդուրժողականութեան եւ փոխադարձ յարգանքի հիմունքներով մի աշխարհ ստեղծելու:

Հանդիպումից յետոյ, պատւիրակութիւնն այցելեց «Ս. Յովսէփ Արեմաթացի» եկեղեցի եւ «Խաչատուր Կեսարացի» անւան թանգարան:

Առիթը պատեհ համարելով, Իրանի «ԻՌՆԱ» լրատւամիջոցի թղթակիցը գերշ. Տ. Բաբգէն եպս. Չարեանի հետ հարցազրոյց ունեցաւ: Գերշ. Սրբազան Հայրը պատասխանելով Սիրիոյ մէջ ծաւալւած ներքին խնդիրների նկատմամբ հայութեան եւ առհասարակ քրիստոնէութեան դիրքորոշման մասին հարցումներին՝ նշեց, որ քրիստոնէութիւնը լինելով սիրոյ, խաղաղութեան եւ եղբայրութեան կրօն՝ դատապարտում է ամէն տեսակ ոխակալութիւն, հակամարդկային արարք, մարդու իրաւունքները ոտնահարող եւ կեանքին սպառնացող գործողութիւններ, հետեւաբար վերջին երկու տարիներում Սիրիոյ մէջ տեղի ունեցող դէպքերը պէտք է խաղաղ միջոցներով շուտափոյթ լուծում գտնեն, որովհետեւ ակնյայտ է, որ մինչ այժմ տեղի ունեցող պատերազմական գործողութիւնները ցանկալի աւարտ չունենալով՝ աւելի են բարդացնում կացութիւնը: Գերշ. Սրբազան Հայրը դատապարտեց նաեւ Ասորի Ուղղափառ եւ Յոյն Օրթոդոքս համանքների հոգեւոր երկու առաջնորդների առեւանգումը հակապետական ուժերի միջոցով, եւ այն համարեց պախարակելի եւ ամօթալի արարք:

Իրանի նախագահական ընտրութիւններին մասնակցելու վերաբերեալ թղթակցի ուղղած հարցումին պատասխանելով, առաջնորդ Սրբազան Հայրն ասաց, որ Իրանում ապրող հայութիւնը միշտ եղել է հաւատարիմ քաղաքացի եւ իր զգօն եւ սթափ մասնակցութիւնն է բերել երկրի ամբողջականութեան եւ զարգացման ուղղութեամբ տարւող աշխատանքներին. այս վերաբերմունքը դարձեալ մղելու է իրանահայութեանը՝ իր քաղաքացիական պարտքն ու պարտականութիւնն անթերի կատարելու: