Նոր Ջուղայի Հայ Մ. Մ. «Արարատ» միութեան 70-ամեակին նւիրւած միջոցառումների շարանը համալրւեց եւս մի այլ ծրագրով. այս անգամ միութեան Ուսանողական միաւորի նախաձեռնութեամբ եւ Կազմակերպիչ յանձնախմբի միջոցով իրականացւած մրցոյթով, որին առանձնաբար մասնակցութիւն էին ցուցաբերել Երէցների, Մարզական, Մշակութային, Սկաուտական եւ Կարգապահական միաւորների վարչութիւններից եւ անդամներից կազմւած հինգ խմբերը եւ միութեան Շահինշահրի մասնաճիւղը ներկայացնող խումբը:
Մրցութային ծրագրին որպէս հանդիսատես ներկայ էին՝ Իրանի Իսլ. խորհրդարանում Սպահանի եւ հարաւային իրանահայութեան պատգամաւոր դոկտ. Գեղարդ Մանսուրեանը, յոբելեար միութեան Կենտ. վարչութեան անդամներն ու միութենականները եւ ժողովուրդ:
Բացման խօսքով հանդէս եկաւ Ուսանողական միաւորի վարչութեան նախագահ Մենուա Յովսէփեանը, ով ողջունելով միութենականների մասնակցութիւնը մրցոյթին, «Արարատ» միութեան առանցքային առաքելութիւնը համարեց հայկական մշակոյթի ու հայ ժողովրդի ինքնութեան պահպանումը եւ որպէս հպարտութեան առիթ նշեց այն հանգամանքը, որ ինքը եւ իր սերնդակիցները, Ուսանողական միաւորի աշխատանքների ծիրում կարողացել են իրենց գործունէութեամբ 70-ամեայ այս միութեան պատմութեան մէջ աւելացնել եւս մէկ էջ: Նա իր խօսքի աւարտին միասնականութիւնը ապագայ յաջողութիւնների ձեռք բերման գրաւականը նկատելով՝ մաղթեց, որ «Արարատ» միութիւնը՝ ինչպէս Հայկական Լեռնաշխարհի Սուրբ «Արարատ» լեռը մնայ կանգուն եւ անսասան։
Յաջորդիւ մեկնարկեց մրցութային բաժինը, հաղորդավարութեամբ Կարին Տէր-Մարտիրոսեանի. որպէս իրաւարար կազմի անդամներ խմբերի պատասխանները գնահատեցին՝ Արփինէ Մովսիսեանը, Անդրիա Խաչատրեանը եւ Վահագն Մինասեանը:
Հարցաշարը բաժանւած էր հետեւեալ մասերի՝ գիտելիքների բաժին, որը հիմնականում կապւած էր Նոր Ջուղայի ու «Արարատ» միութեան պատմութեան եւ երգի անւան գուշակման հետ. միւս հարցաշարում տեղ էին գտել յայտնի դէմքերի եւ դրօշների գուշակումը, բառագիտութեան ու բառակազմութեան խաղեր եւ այլ զւարճալի բաժիններ:
Թէեւ մրցութիւնն ընթացաւ հաճելի, խանդավառ եւ ընկերական մթնոլորտում, սակայն դա չխանգարեց խմբերին իրենց մրցակցութեան ոգու դրսեւորման համար, ինչը ակնյայտ էր իւրաքանչիւր հարցումին պատասխանելու ժամանակ:
Արդիւնքում, իրաւարար կազմի նիշերի ամփոփումից յետոյ, մրցաշարի յաղթողը ճանաչւեց Մարզական միաւորի խումբը:
Վերջում միութեան Կենտ. վարչութեան անդամ եւ Ուսանողական միաւորի հետ կապ Անահիտ Սարհադեանի ու Մենուա Յովսէփեանի միջոցով գնահատագրեր յանձնւեցին մասնակից բոլոր խմբերին, իսկ յաղթողը գնահատւեց ախոյեանի վկայագրով:
Յատկանշական է, որ մրցոյթի Կազմակերպիչ յանձնախմբին անդամակցել էին Ուսանողական միաւորի անդամներ՝ Արփինէ Մովսիսեանը, Վանէ Յովսէփեանը, Էմինէ Խուդաբախշեանը, Արայիկ Թահմազեանը, Գամեր Թահմազեանը եւ Արգամ Յովսէփեանը, որոնց հետ որպէս միաւորի վարչութեան կապ համագործակցել էին՝ Նարէ Ղարախանեանը, Սիսիան Քալանթար Օհանեանը եւ Անդրիա Խաչատրեանը: Նոր Ջուղայի թեմայով գիտելիքների հարցումների կազմութեան գործում կազմակերպիչներին օժանդակել էր Սպահանի հայոց թեմի առաջնորդարանի Զբօսաշրջութեան գրասենեակը:
Թղթակից (Նոր Ջուղա)