Երկուշաբթի՝ հոկտեմբերի 20-ի երեկոյեան, Ս. Ամենափրկիչ վանքի «Ս. Յովսէփ Արիմաթացի» եկեղեցու անւանակոչութեան տօնը նշւեց Սուրբ եւ Անմահ Պատարագի մատուցմամբ, նախագահութեամբ Սպահանի հայոց թեմի Առաջնորդ գերշ. Տ. Սիփան Ս. Արք. Քէչէճեանի:

Օրւայ պատարագիչն էր արժ. Տ. Վարդան քհնյ. Աղաբաբայեանը. մասնակցում էր նաեւ թեմի եկեղեցական դասը, իսկ երգեցողութիւնը կատարեց Ս. Ամենափրկիչ վանքի «Կոմիտաս» երգչախումբը, ղեկավարութեամբ Արբի Բաբումեանի:

Յաւարտ Ս. Պատարագի, Ս. Յովսէփ Արիմաթացիի աջով կատարւեց ջրօրհնէքի կարգը եւ տեղի ունեցաւ հոգեհանգստեան պաշտօն՝ վանքում պաշտօնավարած հոգեւորական եւ աշխարհական ննջեցեալ սպասաւորների, նաեւ եկեղեցու բարերարների հոգիների խաղաղութեան համար:

Այնուհետեւ վանքի շրջափակում իրականացւեց գեղարւեստական յայտագրով ծրագիր, հաղորդավարութեամբ Արգին Աբնուսեանի: Նա այս բաժնի բացման խօսքում անդրադարձ ունենալով այն փաստին, որ «Ս. Յովսէփ Արիմաթացի» եկեղեցին եւ նրան շրջապատող Ս. Ամենափրկիչ վանքը դասւում են աշխարհի հոյակերտ ու հոյակառոյց շէնքերի շարքին՝ որպէս անզուգական գեղեցկութեամբ շինութիւն, աւելացրեց, թէ շէնքից բացի, այս վայրը հպարտութեան առիթ է հանդիսանում երկրին ու հայ ազգին պարգեւած դէմքերով՝ սկսած Խաչատուր վրդ. Կեսարացուց մինչեւ Յովհաննէս վարդապետը, Սիմէոն վարդ. Ջուղայեցին եւ այլ յայտնիները:

Ծրագրում, որպէս գեղարւեստական կատարումներ, նախ Ս. Ամենափրկիչ վանքի «Տաթեւ» երգչախմբից՝ Ասպետ Մարգարեանն ու Արեգա Յարութիւնեանը, հերթաբար մենակատարեցին «Իմ լաւ, իմ լաւ» եւ «Ալվան վարդեր» երգերը, ապա Նոր Ջուղայի Հայուհեաց Բարեգործական ընկերութեան «Փարոս» ասմունքի խմբի անդամուհիներ՝ Սերինէ Յակոբեանն ու Բիւրեղ Տէր-Յովհաննիսեանը ասմունքեցին Չարենցի «Ես իմ անուշ Հայաստանի» եւ Շիրազի «Մասիսն ի վեր» բանաստեղծութիւնները եւ որպէս եզրափակիչ ելոյթ, Փերիոյ Կրթասիրաց միութեան «Էրեբունի» պարախմբի մենակատարներ՝ Ալինէ Յարութիւնեանն ու Արիգա Օրոջեանը հերթաբար ներկայացրին «Սայեաթ Նովա» եւ «Սպիտակ աղաւնի» համարները, իսկ խումը կատարեց Արա Գէորգեանի «Սարդարապատ» ստեղծագործութեան հնչիւնների ներքոյ իր պարը:

Միջոցառման աւարտին, իր հայրական պատգամը փոխանցեց գերշ. Սրբազան Հայրը, ով աւարտելով իր աշխատանքային ժամանակաշրջանը, աւելի քան 9 տարի Սպահանի հայոց թեմի ժողովրդի կողքին լինելով, շուտով թողնելու է այս թեմը:

Սրբազան Հայրն իր խօսքում նշելով Աւետարանում յիշատակւած երկու Յովսէփներին՝ առաջինը որպէս Աստւածահայր եւ Յիսուսին աշխարհին յանձնող, իսկ երկրորդը՝ Արիմաթացին, որպէս Յիսուսի դիակի ստացող, ընդգծեց, թէ նշւած երկու դէպքերում էլ յանձնւողը եւ ստացւողը Յիսուսն է, որը մեծագոյն գանձ է: Նա նմանութիւններ անցկացնելով մեծագոյն գանձ Յիսուսի եւ սփիւռքահայութեան մեծագոյն գանձի միջեւ, շեշտաւորեց, որ այս սփիւռքահայութեան գանձն ու արժէքները պահելու, պահպանելու, եւ իհարկէ այն յաջորդ սերունդներին փոխանցելու համար պէտք է անշուշտ սերտել պատմութիւնը:

Երեկոն աւարտւեց ընդունելութեամբ, որի ընթացքում ներկաները մօտեցան Սրբազան Հօրը եւ իրենց ջերմ խօսքերն ու մաղթանքները փոխանցեցին նրան:

Ծրագրին ներկայ էին՝ Իրանի Իսլ. խորհրդարանում Սպահանի եւ հարաւային իրանահայութեան պատգամաւոր դոկտ. Գեղարդ Մանսուրեանը, թեմի ազգային մարմինների եւ շրջանի Հայ Դատի յանձնախմբի ներկայացուցիչները եւ ժողովուրդ:

Թղթակից (Նոր Ջուղա)