Օգոստոսի 20-ին եւ 21-ին, Նոր Ջուղայի Սուրբ Ամենափրկիչ վանքի «Ս. Ներսէս Շնորհալի» գրադարանում, առանձին չորս սեանսերի ներքոյ կայացաւ Աթաբէկ Խնկոյեանի «Մկների Ժողովը» հեքիաթի տիկնիկային թատրոնի բեմադրութիւնը, նախաձեռնութեամբ նոյն գրադարանի պատասխանատուների:

Ներկայացումը, որը մեծ ընդառաջում գտաւ թէ՛ կրտսերների եւ թէ՛ մեծահասակների կողմից եւ խանդավառ մթնոլորտ պարգեւեց հանդիսատեսին, սկիզբ առաւ պատմիչ Պիպոզի խօսքով, ապա բոլորիս ծանօթ ստեղծագործութիւնը բեմականացւեց կատւի եւ տիկնիկ մկների հետաքրքիր կատարմամբ, իսկ տիկնիկախաղին զուգորդւած երգերն առաւել ուրախ տրամադրութիւն առաջացրին երեխաների մօտ: Ներկայացման եզրափակիչ երգով փոքրիկներին խրատ տրւեց, որ միշտ բարի լինեն եւ չմոռանան, թէ «Վերջում բարին է յաղթում»:

Այս տիկնիկայինի կախարդանքը հիւսւեց բեմադրիչներ` Ռիմա Սիմոնեանի եւ Կարին Տէր-Մարտիրոսեանի միջոցով:

Տիկնիկայինի մասնակիցներն էին՝ 

Պատմիչի՝ Պիպոզի դերում` Ալինա Տէր-Սուքիասեանը, փիսիկի դերում` Լալագէ Իսաղուլեանը եւ տիկնիկավարներ՝ Նոռա Ոսկանեանը, Սիլվա Փանոսեանը, Դեզիրէ Մկրտչեանը, Մառիետ Աբէլեանը, Սարինէ Յարութիւնեանն ու Նազելի Ղարիբեանը, ովքեր շունչ ու հոգի պարգեւեցին չարաճճի մկնիկներին:

Ծրագրի իրականացման գործում իրենց համագործակցութիւնն էին ցուցաբերել Նոր Ջուղայի Հայ Մ.Մ. «Արարատ» միութիւնը, ինչպէս նաեւ Նոր Ջուղայի հայոց ազգ. մանկապարտէզը:

Յատկանշական է, որ առաջին սեանսի աւարտին, «Ս. Ներսէս Շնորհալի» գրադարանի տնօրէն Վերգինէ Միրզախանեանի կողմից հնչեց շնորհակալական խօսքեր եւ մասնակիցներին ու համագործակցողներին շնորհւեցին գնահատագրեր:

 Յատկանշական է, որ այս ներկայացման պրեմիերան տեղի էր ունեցել 2016 թւականին, գրադարանի 110-ամեակի առիթով։

Թղթակից (Նոր  Ջուղա)