Իրանի Արտաքին գործերի նախարար Աբբաս Արաղչին, իր նահանգային դիւանագիտական այցելութեան երկրորդ օրւայ ընթացքում, ուրբաթ՝ թւականիս դեկտեմբերի 26-ի առաւօտեան, ընկերակցութեամբ Սպահանի նահանգապետ դոկտ. Ջամալինեժադի, նախարարի մամլոյ խօսնակ Էսմայիլ Բաղայիի եւ նախարարութեան Սպահանի ներկայացուցչութեան ղեկավար դոկտ. Դոլաթեառիի ժամանեց Ազգային առաջնորդարան։
Պատւիրակութեանը Ս. Ամենափրկիչ վանքի մուտքի մօտ դիմաւորեցին ԻԻ խորհրդարանի Սպահանի եւ հարաւային իրանահայութեան պատգամաւոր դոկտ. Գեղարդ Մանսուրեանը եւ թեմի Պատգ. ժողովի, Թեմական ու Կրօնական խորհուրդների ատենապետներ Նոէլ Մինասեանը, Վաչիկ Հայրապետեանը եւ Զաւէն Սիմոնեանը, որոնց ուղեկցութեամբ հիւրերն այցելեցին "Ս. Յովսէփ Արիմաթացի" եկեղեցի եւ "Խաչատուր Կեսարացի" թանգարան, ուր ներկայացւեցին թանգարանում պահւող իրերի եւ Նոր Ջուղայի հայութեան պատմութեան վերաբերեալ տեղեկութիւններ։
Ս. Ա. Վանքի "Ծաղկեայ դահլիճ"-ում ներկաներին միացան առաջնորդական տեղապահ Հոգ. Տ. Արտաւազդ վրդ. Շարոյեանը, Պատգ. ժողովի փոխ-ատենապետ Աշոտ Դաւթեանը եւ Թեմական խորհրդի անդամներ Ռայեա Խուդավերդեանն ու Տարօն Տէր-Մարտիրոսեանը, ինչպէս նաեւ Իրան-Իրաք պարտադրեալ պատերազմի նահատակ Ռայմոնդ Խաթուննեժադի եղբայրը՝ Ռազմիկ Խաթուննեժադը։
Բացման եւ բարի գալստեան խօսքերով հանդէս եկաւ Նոէլ Մինասեանը, ով ողջունելով արտգործնախարարի եւ նրան ընկերակցող երկրի եւ նահանգի բարձրաստիճան պատասխանատու այրերի ներկայութիւնը Ազգային առաջնորդարանում, խորհրդանշական նկատեց թեմիս հոգեւոր առաջնորդի աշխատանքային առաջին օրւայ եւ երկրի արտաքին գործոց նախարարի՝ Ազգային առաջնորդարան կատարած առաջին այցի զուգադիպութիւնը։ Այնուհետեւ անդրադարձաւ ունեցաւ երկրի քաղաքական, մշակութային եւ տնտեսական ոլորտների առաջընթացի եւ վերելքի գործում իրանահայութեան կարեւոր դերակատարութեանը, ընդգծելով Իրանի անկախութեան եւ հողային ամբողջականութեան պահպանման գործում իրանահայութեան կարեւոր ներդրումը, դրա վառ ապացոյցը համարելով Իրան-Իրաք պարտադրեալ պատերազմի ընթացքում բազմաթիւ հայ երիտասարդների զոհաբերութիւնն ու հայորդիների նահատակութիւնը։
Յաջորդիւ արտայայտւեց Հոգ. Տ. Արտաւազդ վրդ. Շարոյեանը, ով իր ուրախութիւնը յայտնեց բարձրաստիճան պատւիրակութեանը Ազգային առաջնորդարանում հիւրընկալելու կապակցութեամբ։
Դոկտ. Գեղարդ Մանսուրեանը եւս ողջունելով հիւրերին, շնորհակալութիւն յայտնեց Իրանի իշխանաւորներին՝ իրանահայութեան նկատմամբ դրսեւորած դրական եւ բարիացակամ վերաբերմունքի, մասնաւորաբար կրօնական ծիսակատարութիւնների եւ հայոց դպրոցներում հայոց լեզւի ուսուցման ուղղութեամբ տւած ազատութիւնների համար, արտգործնախարարին՝ փոքրամասնութիւնների պատգամաւորների հետ ունեցած ջերմ եւ շարունակական կապի եւ Սպահանի նահանգապետին, թէ իր եւ թէ ազգային իշխանութեան հետ սերտ գործակցութեան առթիւ։
Խորհրդարանի պատգամաւորն իր արտայայտութիւնների մէկ այլ բաժնում յիշելով 2020 թւականից սկսեալ Բաքւի բանտերում պահւող հայ գերիներին, արտգործնախարար Արաղչիին դիմեց, որպէսզի իր ադրբեջանցի գործընկերոջ հետ ունենալիք հանդիպումների ընթացքում առաջ քաշի գերիների անյապաղ ազատ արձակման հարցը։
Նա իր մտահոգութիւնը յայտնեց նաեւ Իրան֊Հայաստան սահմանի եւ Զանգեզուրի միջանցքի շուրջ ծաւալւող իրադարձութիւնների վերաբերեալ, շեշտելով երկու երկրների պատմական սահմանի անփոփոխ մնալու անհրաժեշտութիւնը։
Աբբաս Արաղչին շնորհաւորելով Նոր Տարին եւ Յիսուս Քրիստոսի Ս. Ծնունդը, յոյս յատնեց, որ գալիք տարի լինելու է խաղաղութեան եւ յաջողութեան տարի եւ բոլորին մաղթեց առոջութիւն եւ նորանոր վերելքներ։
Նա նշեց, թէ աշխարհի քիչ վայրերում կարելի է տեսնել տարբեր կրօնների հետեւորդների կողք-կողքի ապրելու իրողութիւնը՝ խաղաղութեան ու հանդուրժողականութեան պայմաններում եւ մշակութային համակեցութեամբ։
Արտգործնախարարը շեշտելով, որ նախարարութիւնում որեւէ տարբերութիւն չի դրւում միաստւածեան կրօնների հետեւողների միջեւ, ասաց. "Մենք բոլորս իրանցիներ ենք, մենք մտածում ենք Իրանի համար, ձգտում ենք Իրանի համար եւ արիւն ենք թափելու Իրանի համար, այնպէս, ինչպէս վարւեցինք 12-օրեայ պատերազմում։
Դոկտ. Ջամալինեժադը եւս իր հերթին շնորհաւորելով Ամանորն ու Ս. Ծնունդը, Սպահանը ներկայացրեց, որպէս միաստւածային կրօնների հետեւորդների համակեցութեան օրրան, այնուհետեւ յատուկ շնորհակալութիւն յայտնեց Գեղարդ Մանսուրեանին՝ Սպահանի պետական կառոյցների հետ իր սերտ համագործակցութեան, ինչպէս նաեւ Սպահանի նկատմամբ իր սրտցաւ մօտեցման համար։
Եզրափակիչ խօսքով կրկին հանդէս եկաւ Պատգ. ժողովի ատենապետը։ Նա դիմելով Աբբաս Արաղչիին, անդրադարձաւ աշխարհասփիւռ հայութեան ունեցած ներուժին եւ նրանց կողմից իրականացւող հսկայ աշխատանքներին։ Այնուհետեւ շնորհակալական խօսք ուղղեց Սպահանի նահանգապետին, ով իր վարած տարբեր պաշտօններում, միշտ համագործակցել է տեղի ազգային կառոյցի հետ եւ փորձել միասնաբար լուծել առկայ բոլոր դժւարութիւնները։
Հանդիպման աւարտին արտգործնախարարին նւիրւեց յուշանւէր։
Հանրային Կապ
Սպահանի Հայոց Թեմի Ազգային Առաջնորդարանի