Վերջերս գումարւեց Հայ Ուս. «Չհարմահալ» միութեան Նոր Ջուղայի մասնաճիւղի 44-րդ Ընդհանուր ժողովը, որի արդիւնքում ընտրւեց վարչութեան նոր կազմ, հետեւեալ կարգով.

Վրդանէս Մկրտչեան՝ նախագահ

Արթին Մելիքեան՝ փոխ-նախագահ

Ֆրիդա Ալավերդեան՝ քարտուղար

Սոնիա Միրզաբէգեան՝ գանձապահ

Սոնիա Մկրտչեան՝ գոյքապահ.

Նորընտիր կազմն այս մասին Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանին իրազեկելու, ինչպէս նաեւ Սրբազան Հօր հայրական օրհնանքն ստանալու համար՝ այցելեց առաջնորդանիստ Ս. Ամենափրկիչ վանք,  հինգշաբթի՝ յունիսի 2-ին:

Հանդիպման սկզբում Վրդանէս Մկրտչեանը զեկոյցով հանդէս եկաւ մասնաճիւղի 44-րդ Ընդհանուր ժողովի եւ նորընտիր վարչութեան առաջին նիստի ու պարտականութիւնների բաժանման շուրջ:

Նա յատկապէս ընդգծելով, որ կազմը միասնական ջանքերով լծւել է աշխատանքի, աւելացրեց, թէ այս ժամանակահատւածում հանդիպում են ունեցալ նաեւ Փերիոյ Կրթ. միութեան Կենտ վարչութեան հետ, որտեղ ջերմ մթնոլորտում փոխանակւել են տեսակէտներ եւ առաջարկներ զոյգ միութիւնների աշխատանքների վերելքի առնչութեամբ: Պրն. Մկրտչեանը նաեւ տեղեկացրեց, թէ նշւած հանդիպման ընթացքում զոյգ վարչութիւնները մեծ ցանկութիւն են յայտնել Թեմական խորհրդի կողմից իրենց տրամադրւած նոր կենտրոնատեղիի պաշտօնական բացումը կատարել գերշ. Տ. Սիփան Ս. Եպս. Քէչէճեանի ձեռամբ, որն ընդառաջւեց Սրբազան Հօր կողմից:  

Այնուհետեւ Սրբազան Հայրն շնորհաւորանքի խօսք փոխանցելով նորընտիր կազմին՝ նրանց մաղթեց առաւել եռանդ՝ իրենց միութենական աշխատանքներում:

Ընթացքում միութենականները նաեւ բացատրութեամբ հանդէս եկան Հայ Ուս. «Չհարմահալ» միութեան հիմնադրման եւ տարիների գործունէութեան, ինչպէս նաեւ Թեհրանում իրականացւող Պատգամաւորական ժողովի մասին:

Մտքեր փոխանակւեց նաեւ միութեան շարքերում երիտասարդներ ներգրաււելու անհրաժեշտութեան մասին՝ ընդգծելով, որ վերջին ժամանակներում այս սերնդի նախասիրութիւնները մեծ փոփոխութիւններ են կրել:

 

Թղթակից (Նոր Ջուղա)