Հինգշաբթի, դեկտ. 16-ի, երեկոյեան «Արարատ» մարզաւանի «Սասունցի Դաւիթ» սրահում իրանահայ եռեակ թեմերի հոգեւոր ու ազգային ներկայացուցիչների եւ «Ալիք»-ը իրենց օջախներում վառ պահող հայրենակիցների խրախուսիչ ներկայութեամբ նշանաւորւեց «Ալիք» օրաթերթի 90-ամեակը: Հաղորդում է «alikonline.ir»-ը:

Իրանի Իսլ. Հանրապետութեան պետական հիմներգով մեկնարկած միջոցառմանը ներկաները մէկ րոպէ յոտնկայս լռութեամբ յարգեցին Արցախեան 44-օրեայ պատերազմում նահատակների, «Ալիք»-ի հիմնադիրների, «Ալիք»-ի 90-ամեայ ընտանիքի եւ նորոգ հանգուցեալ եւ ժամանակի խմբագիր Նորայր Էլսայեանի, նախկին արտօնատէր Ռոստոմ Ստեփանեանի եւ ազգային-հասարակական գործիչ Եղիշ Գալստեանի յիշատակը: Երեկոն զուգորդւած էր «Ալիք»-ի 90-ամեայ անցած ուղին խորհրդանշող տեսաֆիլմի ցուցադրմամբ, որի մէջ ներառւած էր նաեւ ուղերձներ եւ խօսքեր, ինչպէս ՀՅԴ Բիւրոյի անդամ Վիգէն Բաղումեանի, «Ալիք» օրաթերթի արտօնատէր Ալբերտ Աճեմեանի եւ ժամանակի խմբագիր Սեդա Դաւթեանի:

Միջոցառումը պարունակում էր դասախօսութիւն, խօսքեր եւ ուղերձների ընթերցում:

Օրւայ հաղորդավար Արտոյտ Զոհրաբեանը ընթերցելով բանաստեղծ Վարանդի, «Ալիք»-ին ձօնած բանաստեղծութիւնը, բեմ հրաւիրեց «Ալիք» օրաթերթի գլխաւոր խմբագիր Դերենիկ Մելիքեանին, ով իր խօսքերի առանցքում երախտագիտութիւն ու շնորհակալութիւն յայտնեց բոլոր նրանց, որոնց 90-ամեայ գոյութեամբ է պայմանաւորւած եղել «Ալիք»-ի գոյութիւնն ու յարատեւութիւնը:

Հանդիսութեանը նաեւ, որպէս օրւայ բանախօս ելոյթ ունեցաւ Թեհրանի հայոց թեմի առաջնորդ Տ. Սեպուհ արք. Սարգսեանը: Իր ելոյթի ընթացքում թեմակալ առաջնորդը անդրադառնալով աշխարհում մամուլի պատմութեանը, կարեւորութեամբ ընդգծեց հայ մամուլի պատմականը ու առաքելութիւնը: Սրբազան Հայրը իր ելոյթը այսպէս սկսեց. «Քրիստոնէական ջերմ սիրով եւ յաջողութեան բիւրապատիկ մաղթանքներով ողջունում եմ Իրանի երկնակամարի ներքոյ ծնած, աճած, հայ մամուլի նահապետը հանդիսացող «Ալիք» օրաթերթն ու «Ալիք»-ի ողջ ընտանիքը, որ իր ինքնուրոյն ու իւրայատուկ ծառայութեամբ եւ գիտակից իր կոչումին ու առաքելութեան, գործել է ու գործում է եւ դեռ շատ երկար տարիներ գործելու է, հանդիսանալով ոչ միայն հասարակական յարաբերութիւնների կեանքի հայելին, այլեւ գաղութի մտաւորական կեանքի զարգացման գաղափարական աշխատանքը ձեւաւորողը: Այո՛, հայ մամուլի կոչումին հաւատարիմ «Ալիք»-ը հանրային կարծիքի ձեւաւորման ու կազմաւորման մէջ իր անուրանալի դերն է ունեցել եւ ունենում»:

Սրբազան Հայրը ընդգծեց. «Էական ու հրատապ կոչում է հայ մամուլի մարդակերտումի, ազգակերտումի, ազգապահպանման նւիրական գիտակցութեամբ գործելը, որպէսզի իրանահայ մարդը դարձնել ընկերասէր, այլասէր, հասարակութեան սպասաւոր, նրանից հեռու վանելով այլամերժութեան ամէն տեսակի երեւոյթ եւ ինչու չէ նաեւ զգացում:

Հայ մամուլը կոչւած է լինել կեանքի հայելի, իր ընթերցողների կեանքի ռահվիրան, ի խնդիր հաւատարիմ քաղաքացու պատրաստութեան եւ գիտակից, պայծառատես ու ապագայատեսիլ երիտասարդութեան պատրաստութեան»:

Բանախօսը նշեց. ««Ալիք» օրաթերթը իրանահայ եւ յատկապէս թեհրանահայ կեանքում եղաւ, է եւ մնալու է որպէս մի դպրոց, աւելին՝ իբրեւ մի դարբնոց, որ իր բիւրեղ ազգասիրութեամբ ու հայրենասիրութեամբ ջանաց իր ընտանիքի զաւակների աչքերը միշտ յառած պահել Արարատին ու քառագագաթ Արագածին, որի կատարից անպարան կախւած Լուսաւորիչի կանթեղը հաւատքի ու յոյսի ճառագայթներով պայծառացնում է մեր ժողովրդի կեանքը»:

Թեմակալ առաջնորդի ելոյթից յետոյ, հրաւիրւեց «Ալիք» հաստատութեան ներկայացուցիչ Արամ Շահնազարեանը: Նա անդրադառնալով «Ալիք»-ի գաղափարախօսական հէնքին եւ ՀՅԴ-ի համար, մամուլի զբաղեցրած ուրոյն դերին ու դիրքին ընդգծեց, որ Դաշնակցութեան համար միշտ ուրոյն տեղ է ունեցել մամուլը եւ Դաշնակցութիւնը միշտ ուրոյն նշանակութիւն է տւել մամուլին:

Մինչ այդ, սակայն, միջոցառմանը յաջորդաբար ընթերցւեցին ՀՅԴ Բիւրոյի, Իրանում ՀՀ արտակարգ եւ լիազօր դեսպան Արսէն Աւագեանի, Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանի եւ իրանահայ մտաւորական Լիդա Բերբերեանի, նաեւ հայաշխարհի մամուլից ու զանգւածային լրատւամիջոցներից շնորհաւորական ուղերձները: Ուղերձներ էին յղել նաեւ՝ ՀՅԴ պաշտօնաթերթ՝ «Դրօշակ»-ը, «Երկիր» կայքէջը, «Ապառաժ»-ը Արցախից, «Հորիզոն» շաթաբաթերթը Կանադայից, «Վանաձայն»-ը Լիբանանից, «Ազդակ» օրաթերթը Լիբանանից, «Գանձասար» թերթը Հալէպից եւ Հայաստանի Ժուռնալիստների միութեան նախագահը: Ընթերցւեցին նաեւ բազմաթիւ ուղերձներ՝ Լոռետա Ղեւոնդեանի, Վանէ Մակարեանի եւ Էմիլ Սէթխանեանի միջոցով:

Նշելի է, որ «Սասունցի Դաւիթ» դահլիճին կից նախասրահում կազմակերպւել էր «Ալիք»-ի 90-ամեակը խորհրդանշող ցուցահանդէս:

Հանդիսութեան աւարտին նախատեսւել էր նաեւ համեստ հիւրասիրութիւն: