Սոյն թւականի նոյեմբերի 25-ից 28-ը Սպահանում տեղի ունեցաւ Սպահանի զբօսաշրջութեան, ձեռարւեստի եւ հիւրանոցների 15-րդ միջազգային ցուցահանդէսը, որին իր մասնակցութիւնը բերեց Սպահանի հայոց թեմի Զբօսաշրջութեան գրասենեակը, Սպահանի Հայոց Թեմի Թեմական խորհրդի նախաձեռնութեամբ՝ պատշաճ կերպով ներկայացնելով Նոր Ջուղայի հարուստ ժառանգութիւնն ու պատմութիւնը։
Սոյն տաղաւարի մի մասում տեսանիւթի միջոցով ներկայացւել էին Նոր Ջուղայի զբօսաշրջային ուղղութիւնները եւ այն նոր քայլուղիները, որոնք աւելանալու են Նոր Ջուղայի շրջագայութեան ծրագրին։ Այս զբօսուղին սկսւում է Մարնան պատմական կամրջից եւ շարունակւում մինչեւ Հաքիմ Նեզամի պողոտայ եւ իր մէջ է ներառում առաջին անգամ այցելւող եկեղեցիներ։
Տաղաւարի մէկ այլ մասը նւիրւած էր Նոր Ջուղայի երաժշտական թանգարանին, որտեղ ցուցադրւել էր ազգային իշխանութեան ֆինանսաւորմամբ եւ նշեալ թանգարանի նւագարանաշինութեան աշխատանոցի համագործակցութեամբ պատրաստւած առաջին քնար նւագարանը։ Այս բաժնում այցելուները նաեւ հնարաւորութիւն ունեցան լսելու հայ երաժիշտների յիշարժան երգերը՝ օգտագործելով տաղաւարում տեղադրւած երաժշտական ստենդից եւ ծանօթանալ հայերի երաժշտական ժառանգութեան հետ։
Հաշւի առնելով այն իրողութիւնը, որ Ս. Ամենափրկիչ վանքը Իրանի եւ Մերձաւոր Արեւելքի առաջին տպագրական կենտրոնն է եւ այն վայրը, որտեղ տպագրւել է նշեալ տարածաշրջանի առաջին գիրքը, տաղաւարում նախագծւել էր ինտերակտիւ բաժին, որտեղ այցելուները կարող էին տպել Վանքի եկեղեցու տեսքով բացիկներ եւ վերցնել դրանք իրենց հետ որպէս յուշանւէր։
Մէկ այլ մասում ցուցադրւել էին հայ հոգեւորականների հագուստի նմուշներ, այդ թւում՝ փորուրար եւ սաղաւարտ, որոնք այցելուների առանձին ուշադրութեանն արժանացան։
Նոյն տաղաւարում ներկայացւել էր Նոր Ջուղայի հայ կնոջ տարազը։ Սոյն տարազը կրող հայուհու միջոցով այցելուներին բացատրւում էր այս զգեստի առանձնայատկութիւններն ու պատմութիւնը։ Այս բաժինը եւս մեծապէս գրաւեց ներկաների հետաքրքրութիւնը։
Տաղաւար այցելողներն առիթ ունեցան հիւրասիրւելու հայկական սուրճով, գաթայով ու քաղցրաւենիքներիով՝ միաժամանակ ծանօթանալով հայկական խոհանոցի հետ։ Այս բաժինը նույնպէս ընդունւեց ոգեւորութեամբ։
Հայկական տաղաւարը մեծ ընդառաջում գտաւ հայ համայնքի ազգայինների ու ժողովրդի կողմից. ցուցահանդէսի չորս օրերի ընթացքում հայկական տաղաւար այցելեցին նաեւ պարսիկ եւ օտարազգի ականաւոր գործիչներ, այդ թւում՝ երկրի գերագոյն առաջնորդի գերագոյն խորհրդական եւ Պարսկերէն լեզւի եւ գրականութեան ակադեմիայի ղեկավար դոկտ. Ղոլամալի Հադդադ Ադելը, Սպահանի նահանգապետ դոկտ. Ջամալինեջադը, Իրանում Հարաւային Կորէայի դեսպանն ու Տաջիկստանի փոխքաղաքապետը, Սպահան նահանգի Մշակութային ժառանգութեան, ձեռարւեստի եւ զբօսաշրջութեան գլխաւոր տնօրէն դոկտ. Քարամզադէն, Իրանի Իսլ. խորհրդարանի Սպահանի ընտրատարածքի պատգամաւոր դոկտ. Աբբաս Մողթադային, Սպահանի առեւտրի, արդիւնաբերութեան, հանքերի եւ գիւղատնտեսութեան պալատի ղեկավար Ամիր Քեշանին եւ սոյն կառոյցի զբօսաշրջութեան յանձնաժողովի ղեկավար դոկտ. Իզադին, ինչպէս նաեւ յայտնի արւեստագէն Հասան Աքլիլին եւ տարբեր շրջաններից ժամանած զբօսաշրջութեան ոլորտի ներկայացուցիչներ։
Ուրախութեամբ պէտք է նշել, որ սոյն հայկական տաղաւարը գնահատւում է այս ցուցահանդէսի ամենից ակտիւ եւ շատ այցելու ունեցող տաղաւարներից մէկը։ Սոյն ցուցահանդէսին մասնակցութիւնը Զբօսաշրջութեան գրասենեակի համար բերեց նոր ձեռքբերումներ, հաստատւեցին համագործակցութեան նոր եզրեր եւ գործնական բազմաթիւ կապեր։
Տաղաւարի պատրաստման դերակատար անձինք՝
Թեմական խորհրդի կապ՝ Մեղեդի Խուդաբախշեան
Ընդհանուր պատասխանատու՝ Վերգինէ Միրզախանեան
Տաղաւարի ձեւաւորում ու գրաֆիկ՝ Նորւիկ Աբգարեան, Վանանդ Իսաղուլեան
Գեղարւեստական եւ սցենարի բաժին՝ Կարին Տէր-Մարտիրոսեան
Տեսանիւթի պատրաստում՝ Նարէ Մարկոսեան
Ուղեցոյցներ՝ Արգին Աբնուսեան, Կարէն Դիլանչեան, Նորայր Կարապետեան
Տարազաւոր՝ Ալենուշ Թորոսեան
Միջոցառման հովանաւորներ՝
«Խանեյէ Քեշիշ» հիւրանոց
«Մուսիօ Առաքել» աւանդական ճաշարան
«Անի» սրճարան
«Coffeecenter» սրճարան
Թղթակից (Նոր Ջուղա)