Իրանի Իսլ. խորհրդարանի պատգամաւոր Ռոբերտ Բեգլարեանը կիրակի՝ 21 նոյեմբերին հանդիպում ունեցաւ Սպահանի հայոց թեմի Կալւածա-Տնտեսական մարմնի ատենապետ Նարբէ Ջարդն-Դաւուդի հետ:

Հանդիպման ընթացքում Ռոբերտ Բեգլարեանն անդրադարձաւ բնակարանային խնդիրներով պատգամաւորի գրասենեակ դիմած անձանց դժւարութիւններին:

Նա մատնանշելով երկրի տնտեսական ծանր կացութեան բացասական ազդեցութիւնը համայնքի ընտանիքների սոցիալական եւ նիւթական կարիքների վրայ, կարեւորեց առկայ դժւարութիւնները մեղմելու անհրաժեշտութիւնը:

Նարբէ Ջարդն Դաւուդը տեղեկութիւններ փոխանցեց Կալւածա-Տնտեսական մարմնի աշխատանքային ընթացքի եւ գոյութիւն ունեցող դժւարութիւնների վերաբերեալ:

Նա նշեց, թէ թեմապատկան բնակարան վարձելու համար Կալւածա-Տնտեսական մարմնին դիմող անձանց թիւը մեծ է, իսկ ազգային իշխանութեան հնարաւորութիւնները սահմանափակ, հետեւաբար մարմնի կարողութեան սահմաններից վեր է արագ ընթացք տալ ստացած դիմումներին:

Այնուհետեւ տեղի ունեցաւ խորհրդակցութիւն համայնքի ընտանիքներին օժանդակելու ծրագիր մշակելու վերաբերեալ եւ անհրաժեշտ նկատւեց շարունակել պատգամաւորի եւ Կալւածա-Տնտեսական մարմնի կապը ցանկալի արդիւնքի հասնելու համար:

Ռոբերտ Բեգլարեանի գրասենեակ