Հայ մատաղ սերնդին առաւել չափով թանգարանային մշակոյթին հաղորդ դարձնելու նպատակով, Նոր Ջուղայի հայոց ազգ. «Քանանեան-Կատարինեան» միջնակարգ դպրոցի տնօրէնութեան եւ անձնակազմի նախաձեռնութեամբ, Թանգարանների միջազգային օրւայ առթիւ իրականացւեց Նոր Ջուղայի հայոց ազգագրական թանգարանի ուղեվարների մրցութային միոջցառումը, չորեքշաբթի՝ մայիսի 18-ին, վերոնշեալ թանգարանում, որը գտնւում է Նոր Ջուղայի «Ս. Ամենափրկիչ» վանքում:

Մրցոյթի մասնակից եօթ աշակերտներն իրենց պատմութեան ուսուցչուհի Կարին Տէր-Մարտիրոսեանի ուղեկցութեամբ նախապէս այցելել էին Ազգագրական թանգարան, որտեղ ծանօթանալով զանազան կրպակներին, ընտրել էին իրենց նախասիրած բաժինը եւ զբաղւել պատկան ցուցանմուշների ուսումնասիրութեամբ:

Մրցոյթի ձեւի համաձայն, մասնակիցներն առանձնաբար բացատրութեամբ հանդէս եկան իրենց ընտրած կրպակների ցուցանմուշների մասին, ապա ելոյթները գնահատւեցին իրաւարար կազմի անդամներ՝ «Քանանեան-Կատարինեան» դպրոցի բարեկամ, ճարտարապետ Նայիրի Այւազեանի, «Ս. Ամենափրկիչ» վանքի թանգարանների արհեստավարժ ուղեվար Արլետ Հայրապետեանի եւ Ազգագրական թանգարանի գործադիր յանձնախմբի անդամ եւ զբօսաշրջութեան ոլորտում աշխատող Արգին Աբնուսեանի կողմից. վերջում մասնակիցները լաւագոյնը ճանաչւեցին հետեւեալ անւանակարգերում.

Էմիլի Նաւասարդանի՝ բարեհամբոյր ուղեվար

Էմին Բարսեղեան՝ թեմային լաւագոյնս տիապետող ուղեվար

Թանիա Յովսէփեան՝ թեման գեղեցիկ մատուցող ուղեվար

Վահագն Մինասեան՝ գիտակ ուղեվար

Դանիթա Ղազարեան՝ ճարտասան եւ մարմնի լեզւից օգտւող ուղեվար

Սէրլի Շահմիրզայեան՝ պրոֆեսիոնալ մատուցում

Էմմի Մկրտչեան՝ բծախնդիր նիւթի ճշգրիտ փոխանցման գործում

Գնահատագրերը յանձնեցին «Քանանեան-Կատարինեան» դպրոցի տնօրէն Կարինէ Մինասեանը, փոխ-տնօրէն Ռիմա Սիմոնեանը եւ ուսուցչուհի Կարին Տէր-Մարտիրոսեանը:   

Յատկանշական է, որ աշակերտների բացատրութիւնները ունկնդրեցին նաեւ թանգարանի այցելուները, ովքեր բարձր գնահատեցին պատանիների կարողականութիւնը բովանդակալից տեղեկութիւնների մատուցման գործում:

 

  Թղթակից (Նոր Ջուղա)