Երկուշաբթի՝ 8 Փետրւար 2021-ին, Սպահանի նահանգապետ դոկտ. Աբբաս Ռեզային եւ նրան ուղեկցող պատւիրակութիւնը Նոր Ջուղայի Ազգային Առաջնորդարանում հանդիպեցին Թեմիս առաջնորդ Տ. Սիփան եպս. Քէչէճեանին: Հանդիպմանը մասնակցում էին նաեւ Թեմական եւ Կրօնական խորհուրդների ատենապետներ Վարուժ Մինասեանը եւ Վարուժ Մովսիսեանը, Ազգային Առաջնորդարանի դիւանապետ Արիս Դաւթեանը եւ Հայ Դատի յանձնախմբի ներկայացուցիչ Վահէ Թորոսեանը:

Սկզբում, Դոկտ. Ռեզային շնորհաւորեց Նոր տարին եւ մաղթեց խաղաղութեամբ, երջանկութեամբ եւ առողջութեամբ լի տարի, այնուհետեւ մատնանշեց Սպահան նահանգի աստւածային կրօնների բոլոր հետեւորդների բարեկամութիւնն ու խաղաղ գոյակցութիւնը:

Նահանգապետն իր խօսքում անդրադառնալով Կորոնավիրուսի համաճարակի տնտեսական ծանր հետեւանքներին նշեց, թէ չնայած համավարակի հետեւանքով Սպահան նահանգի զբօսաշրջութեանը հասցւած վնասներին, կառավարութեան կողմից ձեռնարկւել են միջոցառումներ՝ այս ոլորտին աջակցութիւն ցուցաբերելու եւ տնտեսական հետևանքները չեզոքացնելու համար: Այս շրջագծում նա յիշատակեց Սպահան, Ֆարս եւ Եազդ նահանգների միջեւ նախատեսւած «Զբօսաշրջութեան ոսկէ եռանկիւն» խորագրով ծրագիրը, որն ապահովելու է անվտանգ զբօսաշրջութիւն:

Հանդիպման շարունակութեան մէջ Տ. Սիփան եպս. Քէչէճեանն անդրադառնալով Սպահանի նահանգապետարանի եւ քաղաքապետարանի քաղաքացիներին մատուցած ծառայութիւններին, յատկապէս տեղի հայ բնակչութեանը, ընդգծեց, որ այդ ծառայութիւնները բարձրացնելու են Սպահանի դերը, որպէս երկրի զբօսաշրջութեան եւ տնտեսութեան ոլորտների կենտրոն: