Աղբիւր՝ www.alikonline.ir
Ղարաբաղեան հակամարտութեան շուրջ Իսլամական խորհրդարանում Սպահանի եւ հարաւային իրանահայութեան պատգամաւոր Ռոբերտ Բեգլարեանը հարցազրոյցի մասնակցելով, Իրանի Իսլ. Հանրապետութեան ռադիոհեռուստատեսութեան հայերէն ռադիոժամի հետ անդրադարձել է հակամարտութեան հետւեանքով տիրող իրավիճակին, Իրանի հաւասարակշռւած դիրքորոշմանը եւ երրորդ երկրների ոչ-կառուցողական միջամտութիւններին:
Հարցազրոյցի ընթացքում պատգամաւորը ընդգծել է. «Իրանը միշտ փորձել է հաւասարակշռւած եւ խաղաղութեան դիտանկիւնից հանդէս գալ եւ ներկայում եւս պարագան նոյնն է: Իրանը ելնելով իր արտաքին քաղաքականութեան սկզբունքներից, համոզւած է, որ նման խնդիրների եւ հակամարտութիւնների հանգուցալուծումը միայն խաղաղ մթնոլորտում բանակցային գործընթացը եւ դիւանագիտութիւնն է, որից շահելու է տարածաշրջանը, եւ որը անշուշտ բխում է Իրանի շահերից, քանի որ Իրանը իրազեկ է տարածաշրջանի բոլոր իրադարձութիւններին եւ իբրեւ աշխարհաքաղաքական կարեւոր դիրք ունեցող երկիր, շատ բնական է, որ փորձում է այդ խաղաղութիւնը հաստատւած մնայ եւ տարածաշրջանի իրավիճակը կայուն մնայ, որից կօգտւեն բոլորը: Վերստին շեշտաւորում եմ, որ Իրանը համոզւած է եւ շեշտակի կաշխատի, որ խաղաղութիւն տիրի տարածաշրջանում եւ վերսկսեն արդիւնաւէտ բանակցութիւններ»:
Հարցազրոյցի ընթացքում պատգամաւորը անդրադառնալով երրորդ երկրի ներգրաււածութեանը, ընդգծել է. «Երրորդ երկրի միջամտութիւնը որեւէ կերպով չի կարող նպաստել տարածաշրջանի խաղաղութեանը: Դժբախտաբար, արդէն ականատեսն ենք Թուրքիայի եւ Իսրայէլի ոչ-բարիացակամ եւ նենգաբար ազդեցութիւնը պայմաններին, եւ նման միջամտութիւններ չեն կարող նպաստել տարածաշրջանի խաղաղութեանը եւ անկասկած չի բխում նաեւ Իրանի ժողովրդի շահերից, քանի որ այդ երկրների կողքին ականատեսն ենք ԴԱԷՇ-ական բարբարոս խմբաւորումների ներգրաււածութեանը, որոնք Թուրքիայի եւ որոշ երկրների օժանդակութեամբ արդէն մուտք են գործել տարածք եւ Իրանի սահմանների մօտ, որը չափազանց վտանգաւոր է եւ անհանդուրժելի»:
Պատգամաւորը ընդգծեց. «Մենք, իրանահայ համայնքը եւս համոզւած ենք, խաղաղութեան եւ բանակցային գործընթացի, որը բոլոր երկրների առումով խնդիրների կարգաւորման ելքն է, ուստի խորհրդարանում ես եւ Թեհրանի ու հիւսիսային իրանահայութեան պատգամաւոր Արա Շահվերդեանը հանդէս եկանք համատեղ հաղորդագրութեամբ, որի մէջ շեշտակի մտահոգութիւն էինք յայտնել Թուրքիայի միջամտութեան հարցով, յատկապէս երբ Իրանում եւ ինչու չէ խորհրդարանում մեր որոշ գործընկերներ, ելնելով իրենց հասկանալի զգացմունքից, սակայն ոչ ճիշտ ձեւով փորձեցին հաղորդագրութեամբ հանդէս գալ, որը կարիք ունէր ինչ որ հաւասարակշռութեան վերականգնման: Մեզ համար սկզբունքը՝ Իրանի տարածքային ամբողջականութիւնը եւ Իրանի անվտանգութիւնն է եւ այն հանգամանքը, որ Իրանը կարողանայ իր կառուցողական դերը խաղալ այս հակամարտութեան հանգուցալուծման առումով»: