Աղբիւր՝ www.aztagdaily.com
«Մարմարա»-ն հաղորդում է, որ շուրջ 90 թուրք մտաւորականներ, արւեստագէտներ ու ակադեմականներ ստորագրել են մի հաղորդագրութիւն` պահանջելով Թուրքիայի դպրոցներում գործածւած եւ հայերի կամ այլ ազգերի դէմ ատելութիւն սերմանող դասագիրքերը հաւաքել եւ հայ աշակերտներից ներում հայցել` նրանց մէջ հայերի դէմ գրւած ստերի եւ ատելավառ տեղեկութիւնների համար: «Այս գրքերը պէտք է հաւաքւեն: Երբ մուտք ենք գործում 2015, ա՛յս է դէպի հաշտութիւն ու խաղաղութիւն տանող ճամբան»,- ասել են նրանք:
Ստորագրող մտաւորականներից մէկն է Թաներ Աքչամը, որ արդէն այս հարցը օրակարգի վրայ էր բերել չորս յօդւածներով: Նա ասել է. «Մեր մտաւորականների այս ելոյթը մեզ յիշեցնում է, որ որքա՛ն անհրաժեշտ է պատրաստել դասագրքեր, որոնք ազգային կամ կրօնական հաւաքականութիւնների միջեւ պիտի քաջալերեն ո՛չ թէ թշնամութեան ու ատելութեան զգացումները, այլ՝ հրահրեն միասնաբար եւ բարեկամաբար ապրելու փափագը, որոնք (դասագրքերը. «Ա.») պիտի խօսեն ո՛չ թէ ստերի մասին, այլ՝ պատմեն ճշմարտութիւնները: Պատմութեան նկատմամբ պարկեշտ լինելը նախապայման է բարեկամութեան ու հաշտութեան համար: Սիրում եմ յուսալ, որ ստորագրութեան այս արշաւն կընդունւի իբրեւ հասարակաց մի ճիչ` ի նպաստ այն նոր դասագրքերի, որոնց կարօտն ունենք»:
Հաղորդագրութիւնն ստորագրողների շարքին են Ադալեթ Աղաօղլուն, Ահմեդ Ալթանը, Ահմեդ Հաքանը, Ահմեդ Ինսելը, Այշէ Կիւնայսուն, Այշէ Հիւրը, Պասքըն Օրանը, Չենկիզ Աքթարը, Տարօն Աջեմօղլուն, Տենկիր Միր Մեհմեդ Ֆուատը, Տենիզ Թիւրքալին, Ֆերհադ Քենթելը, Հադի Ուլուէնկինը, Հալիլ Պերքթան, Հասան Ջեմալը, Իսմեթ Պերքանը, Մեհմեդ Ալթանը, Մուրատ Պելկէն, Օրալ Չալըշլարը, Օրհան Փամուքը, Օյա Պայտարը, Էօմեր Լաչիները, Փերիհան Մաղդենը, Ռոնի Մարկուլիէսը, Սելիմ Դերինգիլը, Շահին Ալփայը, Շանար Եուրդաթափանը, Թաներ Աքչամը, Ուֆաք Ուրասը, Վեդաթ Թիւրքալին, Եասեմին Չոնկարը եւ Եաւուզ Պայտարը: