Շաբաթ՝ 26 յուլիս 2014-ի առաւօտեան ժամը 10-ին, Սպահանի հայոց թեմի առաջնորդ՝ գերշ. Տ. Բաբգէն եպս. Չարեանը ներկայ գտնւեց Հ.Հ.-ի զինւորների երդման հանդիսաւոր արարողութեանը:

Կանադահայ մի ազնիւ հայորդու բարերարութեամբ բոլոր զինւորների համար պատրաստւել էին գրպանի յատուկ Նոր Կտակարան-Սաղմոսներ: Հանդիսութեանը ներկայ էին բարերարն ու Հայաստանի Աստւածաշնչային ընկերութեան ներկայացուցիչը: Արարողութեան ընթացքում, ամէն զինւոր իր երդումից յետոյ ստացաւ իր սեփական Նոր Կտակարանը ձեռամբ գերշ. Բաբգէն Սրբազանի, ինչպէս նաեւ՝ բարերարի, հրամանատարների եւ զօրամասի հոգեւոր հովիւ՝ Տ. Զաքարիա Քահանայի:

Զօրահանդէսով ուղեկցւած հանդիսութիւնը փակւեց գերշ. Սրբազան Հօր ոգեշնչող պատգամով: Սրբազանն իր գոհունակութիւնը յայտնեց այս եզակի արարողութեանը ներկայ գտնւելու համար եւ իր խօսքում մասնաւորապէս կարեւորեց հայ զինւորի դերը հայոց կեանքում, բայց մանաւանդ հայրենիքի պաշտպանութեան գործում: Նա նշեց. «Ամէն հայի սիրտ այս պահին ձեր առաջ հպարտութեամբ եւ ոգեւորութեամբ է լցւել, գիտակցական այն համոզումով, որ, սիրելի երիտասարդնե՛ր, հայոց պետականութեան ամբողջականութիւնը եւ հայրենիքի պաշպտանութեան գործը ձեզ է յանձնւած: Դուք պաշտպանում էք մեր հայրենի սահմանները, առաւել եւս, ձեր ծնողներին, ձեր քոյրերին եւ եղբայրներին: Ձեզ այսօր տրւեց նաեւ Ս. Գիրք՝ նիւթական զէնքի կողքին Տիրոջ խօսքը, իբրեւ հոգեւոր զէնք, որ ձեզ պաշտպանի վտանգներից, նեղութիւններից եւ ամէն տեսակի փորձութիւններից»: Գերշ. Սրբազանն անփորձանք ծառայութիւն մաղթեց բոլորին եւ ասաց. «Քանի ունենք նման երիտասարդներ, հայոց ժողովուրդը ապրելու եւ գոյատեւելու է: Կեցցէ՛ հայոց բանակը, կեցցէ՛ հայ զինւորը»:

Հանդիսաւոր արարողութիւնը փակւեց գերշ. Սրբազան Հօր «Պապհպանիչ» աղօթքով, որից յետոյ նա այցելեց նաեւ զօրամասի բուժկէտ եւ աղօթեց բուժւող զինւորների համար: