Երեքշաբթի՝ 2013 թւականի մարտի 5-ին, Իրանի Արտաքին Գործոց Նախարարութեան հրաւէրով միջկրօնական երկխօսութիւնների ծրագրերի ծիրում Ռումանիայց ժամանած Օրթոդոքս եկեղեցու 7 հոգանոց մի խումբ՝ բաղկացած բարձրաստիճան հոգեւորականներից եւ Բուխարեստի Աստւածաբանական Համալսարանի դասախօսներից, ընկերակցութեամբ «Ալմոսթաֆա Ալալամիյէ» խմբակցութեան Սպահանի մասնաճիւղի պատասխանատուների, Ս. Ամենափրկչեան Վանք այցելեցին եւ հանդիպում ունեցան Սպահանի Հայոց Թեմի թեմակալ առաջնորդ գերշ. Տ. Բաբգէն եպս. Չարեանի հետ: Հանդիպումը տեղի ունեցաւ Ազգային Առաջնորդարանի Ծաղկեայ դահլիճում, որին ներկայ էին նաեւ Սպահանի Հայոց Թեմի Կրօնական Խորհրդի անդամները:

Առաջնորդ Սրբազան Հայրը ուրախութիւն յայտնելով քրիստոնեայ եղբայրների այցելութեան առթիւ, համապարփակ բացատրութիւն փոխանցեց Սպահանի Հայոց Թեմի կառոյցի ու իրավիճակի եւ Հայոց Եկեղեցու գործունէութեան վերաբերեալ: Նա բարձր գնահատեց կրօնների երկխօսութեան եւ համերաշխ փոխ-յարաբերութիւնների զարգացման ուղղութեամբ տարւող բոլոր աշխատանքները եւ կարեւոր համարեց պատւիրակութեան առաքելութիւնը, որը կարող է եւրոպական երկրներում եւ զանազան առիթներով ճշմարիտ թարգմանը հանդիսանալ Իրանում կրօնական փոքրամասնութիւնների ու յատկապէս քրիստոնէութեան եւ Հայոց Եկեղեցու ունեցած ազատութիւնների եւ վարչական-եկեղեցական ու կրօնական անկախ գործունէութեան մասին: Գերշ. Սրբազան Հայրը յիշելով միաստւածեան կրօնների միջեւ Սպահանում տեղի ունեցած համագումարներն ու համատեղ նիստերը, ասաց որ համերաշխութեան եւ խաղաղ համագոյակցութեան այս նմուշը կարող է իրագործելի օրինակ ծառայել ամբողջ աշխարհի համար, եթէ նպատակ ունենանք եղբայրասիրութիւն եւ մարդասիրութիւն տարածել մեր շուրջ:

Պատւիրակութեան խօսնակ-ներկայացուցիչը ներկայացնելով իր ընկերակիցներին, շնորհակալութիւն յայտնեց ջերմ ընդունելութեան համար եւ համառօտ կերպով տեղեկութիւններ փոխանցեց Ռումանիայում ծաւալած իրենց աշխատանքների, ինչպէս նաեւ այնտեղ ապրող հայ համայնքի ու Հայոց Եկեղեցու գործունէութեան մասին:

«Ալմոսթաֆա Ալալամիյէ» խմբակցութեան Սպահանի մասնաճիւղի կողմից պատւիրակութեանն ընկերակցող ներկայացուցիչն եւս տեղեկութիւններ հաղորդեց խմբի հնգօրեայ ծրագրերի մասին եւ այն հանդիպումների վերաբերեալ, որ ունեցել են իսլամ կրօնի բարձրաստիճան հոգեւորական օրէնսգէտների հետ: Նա նշեց, որ բոլոր հանդիպումների ընթացքում եւս շեշտւել են փոխ-յարաբերութիւնների զարգացման անհրաժեշտութիւնն ու դրական կողմերը:

Պատւիրակութեան անդամները, հանդիպումից յետոյ, այցելեցին Ս. Ամենափրկչեան Վանքի «Յովսէփ Արեմաթացի» եկեղեցի եւ «Խաչատուր Կեսարացի» անւան թանգարան եւ իրենց տպաւորութիւններն արձանագրեցին թանգարանի բարձրաստիճան հիւրերի մատեանում: