ՈՒՍՈՒՄՆԱԿԱՆ ՆՈՐ ՏԱՐԵՇՐՋԱՆԸ ԲՈՒՌՆ ԱՇԽԱՏԱՆՔՈՎ Է ԸՆԹԱՆՈՒՄ ՇԱՀԻՆՇԱՀՐԻ ՀԱՅՈՑ ԱԶԳ. «ՆԱՐԵԿ» ՄԱՆԿԱՊԱՐՏԷԶ-ՆԱԽԱԿՐԹԱՐԱՆՈՒՄ

Ընդամէնը ամիս ու կէս է անցել 2018-2019 թթ. ուսումնական տարեշրջանի մեկնարկից, սակայն Շահինշահրի հայոց ազգ. «Նարեկ» մանկապարտէզ-նախակրթարանի պատասխանատուներին յաջողւել է բուռն աշխատանք իրագործել, թէ դպրոցի ընթացիկ ծրագրերի եւ թէ զանազան միջոցառումների կազմակերպման ուղղութեամբ, որոնցով կարողացել են հաճելի, խանդավառ եւ նորանոր փորձառութիւններով ու գիտելիքներով ողողւած մթնոլորտ ստեղծել սաների համար: 

Այս ծիրում հոկտեմբերի 3-ին, «Նարեկ» մանկապարտէզ-նախակրթարանի աշակերտները դպրոց հասնելուն պէս պատրաստեցին հետաքրքիր ձեռքի աշխատանքներ, որից յետոյ Մանուկների համաշխարհային օրւայ առիթով, սաներն ու իրենց մայրերը մասնակցեցին դպրոցի տեսչութեան եւ ծնողական խորհրդի կողմից կազմակերպւած անակնկալ շրջագայութեանը,  զբօսայգեգնացութեանը: Զբօսայգում անցկացրած դպրոցական օրը յագեցած էր հետաքրքիր գիտելքների ուսուցմամբ ու խաղերով:

Հոկտեմբերի 17-ին, գերպ․Տ․Անանիա ծ․վրդ. Գուճանեանը հրաժեշտի այցով ներկայացաւ մանկապարտէզ-նախակրթարան, ուր իր օրհնանքի խօսքը փոխանցեց սաներին եւ նրանց մաղթեց՝ անհոգ մանկութիւն ու փայլուն ապագայ: Հայր Սուրբին ընկերակցում էր համայնքի ծխատէր քահանայ հայր՝ արժ․Տ․Սահակ քհնյ․Մինասեանը:

Հոկտեմբերի 24-ին, դպրոցի պատասխանատուների նախաձեռնութեամբ, աշնանային եղանակի յատկութիւններին ու գեղեցկութեանն առաւել հաղորդ դառնալու նպատակով,  սաներն ու իրենց մայրիկները դարձեալ յաճախեցին զբօսայգի, ուր աշակերտներն ուսուցչի եւ ծնողների օգնութեամբ աշնանային տերեւներով պատրաստեցին ձեռքի աշխատանքներ, իսկ օրւայ մնացեալ բաժինն անցկացրին զւարճալի խաղերով: 

Նոյեմբերի 4-ին, դպրոցը հիւրընկալեց արժ․ Տ․ Սահակ քհնյ․ Մինասեանին ու Շահինշահրի Հայ կանանց եկեղեցասիրաց միութեան վարչութեանը, ովքեր իրենց ուրախութիւնը յայտնեցին այցի առթիւ եւ պատրաստակամութիւն յայտնեցին դպրոցին աջակցելու իր աշխատանքների իրականացման գործում: Այնուհետեւ դպրոցի սաներն ներկայացրին «Երեք խոզուկ» հեքիաթը, իսկ վերջում քահանայ հայրն ու միութեան վարչութեան նախագահուհի Անահիտ Օհանեանը նւէրներ յանձնեցին աշակերտներին:

Թղթակից (Շահինշահր)

Լուսանկարները տրամադրեց դպրոցի տեսչութիւնը

 

 


Մեկնաբանութիւն գրել


Security code
Թարմացնել

 
Persian   Armenian

Ֆոտօռեպորտաժ

Տեսաֆիլմ